Samkvæmt úrskurði Þjóðskrár er lögheimilisflutningur Einars Birkis Einarssonar, óháðs bæjarfulltrúa í Hafnarfirði, ólögmætur. Frá þessu er greint í Fréttablaðinu. Einar flutti í Kópavoginn úr Hafnarfirði á miðju kjörtímabili en skráði lögheimili sitt hjá ættingjum í Hafnarfirði.

Haft er eftir Margréti Gauju Magnúsdóttur, bæjarfulltrúa Samfylkingarinnar í Hafnarfirði, að Einar hefði tilkynnt bæjarstjórn úrskurðinn á fundi í gær. Hún segir að búið sé að kalla inn varabæjarfulltrúa fyrir Einar, en Borghildur Sturludóttir sat fundinn í hans stað.

Þá sagði hún einnig:

„Þetta fer að verða eins og í einhverri slæmri sænskri bíómynd, svona melódrama. “

Einar sagði sig úr Bjartri framtíð í byrjun apríl, ásamt Guðlaugu Kristjánsdóttur, forseta bæjarstjórnar og báru þau við samstarfsörðugleikum og trúnaðarbresti. Hefur meirihlutinn því hangið á bláþræði vegna deilna um kjörgengi Einars.

Björt Ólafsdóttir, formaður Bjartrar framtíðar, skrifaði einlægan pistil um atburðarrásina í Hafnarfirði, þar sem hún sagði hana ekki vera þau stjórnmál sem flokkurinn vildi kenna sig við.