Dagur B. Eggertsson borgarstjóri og Eyþór Arnalds, oddviti Sjálfstæðisflokksins, eru til viðtals í Morgunblaðinu í dag. Þar er farið yfir víðan völl um stefnur og strauma framboða þeirra fyrir kosningarnar á laugardaginn.
Þegar Dagur er spurður hvað loforð hans muni kosta og hvort álögur muni hækka eða lækka, svarar Dagur því til að meirihlutinn hafi heldur verið að lækka álögur á kjörtímabilinu, þrátt fyrir stór verkefni í fjármálum.
Eyþór skýtur inn í spurningunni: „Hvaða álögur?“, en Dagur heldur áfram:
„Annars vegar leikskólagjöld og hins vegar fasteignaskatta.“
„Fasteignaskatta?“ spyr Eyþór.
Blaðamaðurinn gengur á Dag og ítrekar spurningu sína um hvað þetta muni nú allt kosta:
„Fjárfestingarhlutinn af leikskólapakkanum kostar 3,7 milljarða. Það þarf að byggja 4-6 leikskóla. Við erum síðan að bæta við 30-40 stöðugildum á ári,“ segir Dagur. – Ég er að hugsa um heildartölu? „Þannig að þetta kemur inn í áföngum. Launakostnaðurinn þegar allt er komið er þá á annan milljarð króna. Þetta rúmast innan fimm ára áætlunar eins og við sjáum hana með forgangsröðun okkar. En það þýðir auðvitað að við erum að halda áfram að forgangsraða í þágu skólastarfs og í þágu velferðar.“
Þessu svarar Eyþór, með tilvísun í Lewis Carroll:
„Ef borgarstjóri heldur því fram að álögur hafi lækkað þá er ég Lísa í Undralandi. Vegna þess að fasteignaskattar hafa hækkað um 50% á fjórum árum. Í mínum huga er 50% hækkun ekki lækkun. Númer tvö er að útsvarið var hækkað í botn af borgarstjóra þegar hann var formaður borgarráðs og ekkert sveitarfélag á höfuðborgarsvæðinu innheimtir jafn háa útsvarsprósentu á launað fólk. Þessar hækkanir, auk annarra, til dæmis hjá Orkuveitunni, þar sem gjöld eru núna til dæmis hærri en í Mosfellsbæ, eru ekki lækkanir.“