Reykvíkingar á aldrinum 18-29 ára virðast ekki hafa mikinn áhuga á stefnumálum Sjálfstæðisflokksins, þegar skoðuð er ný könnun Félagsvísindastofnunar fyrir Morgunblaðið, á fylgi framboðanna í borginni.
Aðeins 16,3% aðspurðra á aldrinum 18-29 ára sögðust ætla að kjósa Sjálfstæðisflokkinn, meðan 44% sögðust ætla að kjósa Samfylkinguna.
Svipaða sögu er að segja af fólki á aldrinum 30-44 ára. Þar segjast 17,6% ætla að kjósa Sjálfstæðisflokkinn en 29,7% Samfylkinguna.
Í aldurshópnum 45-59 ára mælist Sjálfstæðisflokkurinn fyrst stærri en Samfylking, með 33.5% móti 26,1% en hinsvegar mælist Samfylking stærri en Sjálfstæðisflokkur meðal þeirra sem eru 60 ára og eldri.
Þegar horft er til kynjaskiptingar kemur í ljós að Samfylkingin er í algerri sérstöðu, því 47,3% kvenna á aldrinum 18-29 ára styðja Dag B. Eggertsson og Samfylkinguna, en aðeins 9,2% Sjálfstæðisflokkinn.
Svipaða sögu er að segja í aldurshópnum 30-44 ára, en 37,3% þeirra kvenna styðja Samfylkinguna, en aðeins 12% Sjálfstæðisflokkinn.
Þegar konur á aldrinum 45-59 ára eru spurðar hvaða flokk þær styðji, jafnast leikar. Alls 30,1% styðja Samfylkingu en 28% Sjálfstæðisflokkinn.
Hjá konum 60 ára og eldri segjast 36,7 % styðja Samfylkingu en 30% Sjálfstæðisflokkinn.
Meðal karla vegna Sjálfstæðisflokknum betur. Í hópnum 18-29 ára segjast 22,5% styðja hann, en 41,4% Samfylkingu.
Í hópi 30-44 ára styðja einnig 22,5% Sjálfstæðisflokkinn, en 23% Samfylkinguna.
Hjá 45-59 ára styðja 37,5% Sjálfstæðisflokkinn, en 23% Samfylkingu.
Í hópi 60 ára og eldri, styðja 27,8% Sjálfstæðisflokkinn og 30% Samfylkingu.
Kjörsókn hefur farið minnkandi frá árinu 1994 og var 62,6% árið 2014. Árið 2010 var hún 73,4 prósent og 2006 77 prósent. Árið 2002 var hún 83,9 prósent.
Í síðustu kosningum kusu aðeins 45 prósent ungmenna á aldrinum 18 til 9 ára og 42 prósent 20-24 ára.
Til að sporna við þessari þróun hyggst Reykjavíkurborg senda ungmennum sms rétt fyrir kosningar, þar sem viðtakendur eru hvattir til að mæta á kjörstað.
