Páley Borgþórsdóttir, lögreglustjóri í Vestmannaeyjum, skrifar mikla lofræðu um Elliða Vignisson, bæjarstjóra Sjálfstæðisflokksins, í pistli á Eyjafréttum í gær. Páley bauð sig fram til bæjarstjórnar árið 2006 fyrir Sjálfstæðisflokkinn og segist þá hafa kynnst Elliða og hans vinnubrögðum, sem hún mærir mikið.
Páley tilgreinir að ástæðan fyrir því að hún skrifi greinina er að henni finnst umræðan ósanngjörn um Elliða:
„Ástæða þess að ég skrifa þessa grein er að mér finnst umræðan ósanngjörn og mér finnst hún ekki sönn. Ég fullyrði að við Eyjamenn gætum ekki átt betri málsvara en Elliða. Hann er ekki gallalaus og eflaust vilja ekki allir vera með honum í tjaldi, en þannig er lífið. Mig langar til að biðja ykkur um að íhuga vandlega hvort þið eruð tilbúin til að missa einn mesta baráttumann Eyjanna frá stjórnun bæjarins og missa þá framtíðarsýn sem við okkur blasir með hann við stjórnvölinn.“
Í athugasemdarkerfi Eyjarfrétta er Páley spurð hvort það sé við hæfi að lögreglustjórinn blandi sér í kosningabaráttuna, en ekkert svar hefur borist þegar þetta er skrifað. Ekki náðist í Páleyju við vinnslu fréttarinnar.
Páley hætti sem bæjarfulltrúi í árslok 2014 er hún var skipuð lögreglustjóri í Vestmannaeyjum.
Hún komst í fréttirnar árið 2016 þegar umboðsmaður Alþingis komst að þeirri niðurstöðu að Páley hefði ekki farið að stjórnsýslulögum er hún réði nýjan lögreglu fulltrúa til embættisins, þar sem hún synjaði umsækjenda sem ekki var boðaður í viðtal, um ferilskrár þeirra sem höfðu verið boðaðir í viðtöl, en ekki hlotið starfið.
Þá komst í hámæli fyrirmæli Páleyjar fyrir þjóðhátið 2015 og 2016, um að lögreglan og þeir sem að hátíðinni stæðu, myndi ekki veita fjölmiðlum upplýsingar um kynferðisbrot sem hugsanlega yrðu framin. Ástæðan var sögð sú að það gæti reynst fórnarlömbunum of þungbært.