Andlit Dags B. Eggertssonar borgarstjóra var fjarlægt eftir að kvartað hafði verið undan því. Ekki er um að ræða eiginlegt andlit borgarstjóra, né framhald kvikmyndarinnar Face/off, heldur auglýsingu Samfylkingarinnar sem sett var upp í glugga hússins á horni Miklubrautar og Lönguhlíðar. Þetta kemur fram í Fréttablaðinu í dag.

Ósamþykktar stúdíóíbúðir eru í húsinu og barst kvörtun frá einum nágranna í götunni. Fyrir kosningarnar 2014 var einnig sett upp auglýsing frá Samfylkingunni á sama stað, en þá var þar blómabúð.

„Fyrir fjórum árum bauð ég Samfylkingunni að setja þarna upp auglýsingar og voru þær þarna í tvær vikur og síðan teknar niður. Eftir það hékk þarna auglýsing frá Tryggingamiðstöðinni þar til kvörtun barst frá eiganda í húsinu sem vildi ekki hafa hana. Þá var hún tekin niður,“

segir Jón Magngeirsson, eigandi húsnæðisins, í Fréttablaðinu í dag. Hann segir að íbúunum hafi verið sama um auglýsinguna.

„Eigandi hússins bauð okkur þetta auglýsingapláss án endurgjalds. Hann var fyrsti fótboltaþjálfari Dags og gamall stuðningsmaður úr Árbænum. Plássið fékkst án endurgjalds fyrir fjórum árum og aftur nú. Þetta er hans leið til að styrkja framboðið,“

er haft eftir Rögnu Sigurðardóttur, kosningastjóra Samfylkingarinnar.

Að hennar sögn voru auglýsingarnar teknar niður eftir að framboðið fékk veður af því að auglýsingarnar hefðu vakið deilur innan húsfélagsins.

Þá segir hún að þau hafi sett upp auglýsinguna í þeirri trú að engin byggi í húsinu.