Davíð Oddsson sér ekki fram á að hætta sem ritstjóri Morgunblaðsins, starfið sé of skemmtilegt til þess. Davíð er í viðtali við Pál Magnússon, þingmann Sjálfstæðisflokksins, á K100. Spurði Páll Davíð meðal annars út í Reykjavíkurbréfin, sem eru fastur liður í Sunnudagsmogganum. Ekki var minnst á Staksteina Morgunblaðsins, en því hefur verið haldið fram að það sé ekki Davíð sem skrifi Staksteinana, heldur aðeins Reykjavíkurbréfin. Má geta þess að Davíð hefur verið launahæsti fjölmiðlamaðurinn í áraraðir, með 3,9 milljónir króna á mánuði árið 2016. Ef rétt er að Reykjavíkurbréfin séu það eina sem Davíð setji í blaðið þá þýðir það að hann fær rúmlega eina milljón króna fyrir hvert Reykjavíkurbréf.
Davíð lýsti ferlinu þannig fyrir sig að hann sest niður heima hjá sér kl. 14 á föstudögum. Hann hafi ekki hugmynd um hvað hann ætli að skrifa. Davíð skrifar með tveimur puttum og því taki ferlið stundum allt að sex klukkutíma. Hann þurfi þó að vera búinn að skila af sér kl. 20, ef hann er ekki búinn að skila þá hafi Haraldur Johannessen, hinn ritstjóri Morgunblaðsins, samband við sig og krefjist þess að hann flýti sér þar sem blaðið sé á leið í prentun.
Þess má geta að Reykjavíkurbréf Sunnudagsmoggans í dag fjallar um ítölsk stjórnmál og gamla vini Davíðs úr borgarstjórn sem hafa fallið frá.