Eva Sigurbjörnsdóttir, oddviti Árneshrepps, lætur hafa eftir sér í Morgunblaðinu í dag að hún eigi ekki von á því að ný hreppsnefnd muni gera breytingar á aðalskipulagi sveitarfélagsins, sem verði til að hindra umdeilda byggingu Hvalárvirkjunar. Eva, sem sjálf er stuðningsmaður þess að fá virkjunina á svæðið, segir að mikið þurfi til að það gæti gerst, þó svo ekkert  sé útilokað í þessum efnum.

„Allt getur svo sem gerst“, er haft eftir Evu.

Sveitastjórnin hefur ekki enn gefið út framkvæmdarleyfi, en það verður gert eftir kosningar. Áður verður þó Skipulagsstofnun að samþykkja breytingar á aðalskipulagi, í þágu Hvalárvirkjunar. Skipulagsstofnun gerði athugasemdir við hvernig staðið var að málunum og bíður því með staðfestingu þangað til skýringar hafa borist frá hreppsnefndinni, en Eva segir að unnið sé að svari.

Líkt og greint hefur verið frá í fréttum hefur orðið skyndileg fjölgun í hreppnum í aðdraganda kosninga. Hreppsnefnd hefur ákveðið að samþykkja kjörskrá með fyrirvara, þar sem Þjóðskrá er með lögheimilisskráningarnar til rannsóknar. Alls 65 eru á kjörskrá, en í fyrra voru 43 á kjörskrá og nemur fjölgunin því 40 prósentum.

Enginn listi er þó í framboði í þessu fámennasta sveitarfélagi landsins. Því fer fram óhlutbundin kosning, þar sem allir yfir 18 ára aldri eru í kjöri. Tveir hreppsnefndarmenn hafa þó beðist undan endurkjöri, en báðir eru andvígir virkjun.

Eva hyggst þó halda áfram gefist þess kostur, en ákvörðun um næsta oddvita verður í höndum nýrrar hreppsnefndar að loknum kosningum.