Ég er mikill aðdáandi Guðna Th. Jóhannessonar og Elizu Reid. Þau eru frjálslynd, víðsýn, vel menntuð, laus við snobb, hofmóð og prjál. Íslendingar völdu vel í síðustu forsetakosningum. Á tíma þegar heimurinn þarf að búa við leiðtoga eins og Donald Trump og Vladimir Putin er fólk eins og Guðni og Eliza mikilvægt.
Hún er frá Kanada, ég myndi líka nefna Justin Trudeau, forsætisráðherra Kanada. Hann kemur reyndar stundum kjánalega fyrir, en í grundvallaratriðum er hann frjálslyndur lýðræðissinni.
En fólk sem gegnir svo háum stöðum lendir í klónum á embættismönnum og prótokollmeisturum, sem ráða sér ekki fyrir snobbi og fara að segja því hvernig það á að hegða sér. Þetta getur orðið býsna erfitt í samskiptum við erlenda þjóðhöfðingja og í opinberum heimsóknum. Sjálfur hef ég sem fréttamaður fylgst með býsna mörgum opinberum heimsóknum – þær eru mismunandi hátignarlegar. Norrænu hirðirnar skora ansi hátt á snobbskalanum.
Ég var að velta fyrir mér hvernig þau Guðni og Eliza eru klædd á þessari mynd, í opinberri heimsókn til Finnlands. Er virkilega þörf á að festa alla þessa borða, medalíur, keðjur og pjátur á okkar ágætu forsetahjón? Einhvern veginn fer þetta aðeins yfir strikið þegar lýðræðislega kjörnir stjórnmálamenn eiga í hlut. Og svo er merkilegt, maður finnur ekki mikið af myndum af valdamiklum forsetum, eins og Bandaríkjanna. Rússlands eða Frakklands, í svona búningi.
Forseti á alveg að geta sagt nei við hirðsiðameistarana. Það móðgast held ég enginn þótt heiðursmerkin á dressinu séu aðeins færri.