Halldóra Mogensen, þingmaður Pírata og formaður velferðarnefndar Alþingis segir stjórnarliða hafa verið snögga við að þétta raðirnar í máli Braga Guðbrandssonar, lýsa yfir stuðningi við félagsmálaráðherra og reyna að útmála hana sem hvatvísan fúskara.
Málið hófst með ítarlegri fréttaskýringu Stundarinnar þar sem greint er frá því að Bragi Guðbrandsson, framkvæmdastjóri Barnaverndarstofu, hafi beitt sér fyrir því að maður sem grunaður var um misnotkun á dætrum sínum fengið umgengni við þær. Er því haldið fram að Ásmundur Einar Daðason, félagsmálaráðherra, hafi leynt þessum upplýsingum fyrir velferðarnefnd Alþingis er afstaða var tekin til þess í febrúar hvort Bragi Guðbrandsson yrði tilnefndur af Íslands hálfu í framboð til Barnaréttarnefndar Sameinuðu þjóðanna, en kjörið fer fram á næstu dögum.
Í fjölmiðlum í gær kom fram að velferðarnefnd hefði fengið þessi gögn og sakaði Sigurður Ingi Jóhannsson, formaður Framsóknarflokksins, meðlimi nefndarinnar um að hafa ekki lesið gögnin. Samkvæmt umræðum í Silfrinu á RÚV í dag er málið hins vegar ekki svona einfalt. Þar sagði Hallóra Mogensen:
„Það hefur ekki farið framhjá mér hvað stjórnarliðar eru fljótir að þétta raðirnar. Forsætisráðherra stígur strax fram og lýsir yfir trausti á ráðherra og talar um að hann hafi lofað velferðarnefnd öllum gögnum. Síðan kemur Sigurður Ingi með sömu tugguna í Víglínunni í gær, þar sem hann í raun segir Velferðarnefnd ekki hafa sinnt sínum skyldum, á meðan við vorum þrjú í nefndinni sem kölluðum eftir þessum gögnum, sem ráðherra er að tala um. Og við þurftum að bíða í mánuð eftir þeim. Þau komu til okkar á þriðjudaginn en það er lögbundin skylda að skila svona gögnum á sjö dögum. En gögnin koma til okkar mjög seint, bara rétt áður en þessi umfjöllun fer af stað.
Ef við hefðum fengið þessi gögn í febrúar þá held ég að málið liti allt öðruvísi út í dag. En af því svo var ekki þá skoðaði ég þessi gögn í gær og ég má ekkert tala um þau. En ég get sagt að ef þessar upplýsingar hefðu legið fyrir í febrúar þá hefði ekki verið svona auðvelt fyrir ríkisstjórnina að tilnefna Braga í þetta starf til Sameinuðu þjóðanna. Núna er mögulega orðið of seint að taka þá ákvörðun til baka.
Birgir Ármannsson {þingmaður Sjálfstæðisflokksins} hikar ekki við að lýsa yfir stuðningi við Braga en hann sat ekki í velferðarnefndinni og hefur ekki séð þessi gögn. En hikar ekki við að segja að aðrir hafi hlaupið á sig. Málið er augljóslega núna að mála mig, formann Velferðarnefndar, upp sem einhvern fúskara, sem hefur hlaupið á sig. Þetta er mjög kunnuglegt stef fyrir okkur Pírata. Síendurtekið erum við máluð upp sem vænisjúkir, hvatvísir fúskarar. Þetta var gert í uppreisn æru málinu, Landsréttarmálinu, akstursmálinu. Við keyrðum þessi mál áfram þrátt fyrri að nákvæmlega sama taktík væri spiluð þar.“