Eyþór Arnalds, borgarstjóraefni Sjálfstæðisflokksins í Reykjavík, sat í stjórnum samtals 26 fyrirtækja og eignarhaldsfélaga á tímabili, en lofaði að segja sig úr þeim er hann ákvað að fara í framboð fyrir Sjálfstæðisflokkinn í borginni. Hann segist vera vel á veg kominn:
„Ég fór bara í þann feril strax, annað hvort að fá aðra inn í þær stjórnir eða að hafa engan. Þá eru bara aðrir sem taka við stjórnuninni. Ég geri það sem ég lofa. Og stend við þetta,“
sagði Eyþór í sjónvarpsþætti Kjarnans sem var á Hringbraut í gærkvöldi.
Eyþór er nú skráður sem stjórnarmaður eða framkvæmdarstjóri í sjö félögum samkvæmt yfirliti hjá Creditinfo, en félag Eyþórs er ennþá stærsti eigandi Árvakurs, sem gefur út Morgunblaðið, en eignarhlutur Eyþórs er 22.87 prósent.
Eyþór segist farinn úr stjórn Árvakurs og engin afskipti hafa af miðlinum:
„Ég hef engin afskipti af Morgunblaðinu í dag. Ef þú veist um kaupanda þá er síminn opinn.“