Samkvæmt nýrri könnun Fréttablaðsins er Sjálfstæðisflokkurinn stærstur flokka í Reykjavík, fær 30,2 prósent og átta menn kjörna. Samfylking fær 25.7 prósent og sjö menn kjörna. Píratar fá 10.7 prósent og tvo menn kjörna. Vinstri grænir fá 7.6 prósent, eins og Miðflokkurinn og fá þeir tvo menn kjörna. Viðreisn fær 7.2 prósent og samkvæmt útreikningum Fréttablaðsins dugar það fyrir tveimur mönnum. Framsóknarflokkurinn fær 3.6 prósent og engan mann kjörinn, en litlu má muna að þeir nái manni af Viðreisn.
Meirihlutinn er því með 11 menn af 23, sem þýðir að fjórði flokkurinn þyrfti að ganga til liðs við Samfylkingu, Pírata og VG til að mynda meirihluta.
Af minni framboðum má nefna Kvennalistann sem fékk 1.4 prósent, Sósíalistaflokkurinn eitt prósent, og Flokkur fólksins eitt prósent. Önnur framboð fengu minna.
Alls 7.4 prósent þeirra sem afstöðu tóku sögðust ætla að kjósa önnur framboð en þau sem náðu inn manni, en samtals eru 17 framboð í Reykjavík.
Hringt var í 1.017 manns með lögheimili í Reykjavík þar til náðist í 801 samkvæmt lagskiptu úrtaki 24. apríl. Svarhlutfallið var 78,8 prósent. Þátttakendur voru valdir með slembiúrtaki úr þjóðskrá. Svarendur skiptust jafnt eftir kyni, og hlutfallslega eftir aldri. Alls tóku 50,8 prósent þeirra sem náðist í afstöðu til spurningarinnar. Þá voru 11,3 prósent sem sögðust ekki ætla að kjósa eða ætla að skila auðu, 16,6 prósent sögðust óákveðin og 21,3 prósent vildu ekki svara spurningunni.