Ragnar Þór Ingólfsson, formaður VR, gagnrýnir harðlega að hluthafar eignarhaldsfélagsins Heimavalla GP, sem sá um umsýslu eigna fyrir leigufélagið frá 2015-2017, skuli fá afhentan hlut að jafnvirði um 400 milljóna króna endurgjaldslaust við skráningu félagsins á hlutabréfamarkað, líkt og Vísir greinir frá.
Hann segir að verið sé að verðlauna útvöldum hópi fyrir að „keyra upp leiguverð“ á fákeppnismarkaði :
„Nú þegar er búið að slíta út úr félaginu hundruð milljóna í formi þóknana fyrir ráðgjafastörf og fleira. Nú gefst útvöldum hópi kostur á 400 milljóna króna hlut á silfurfati sem árangurstengd greiðsla fyrir að keyra upp leiguverð á fákeppnismarkaði þar sem skelfilegt ástand á húsnæðismarkaði hefur skapast, vegna lítils framboðs, og hefur keyrt upp fasteignaverð og þar af leiðandi fasteignamat og á endanum eignir félagsins.“
Þá segir Ragnar að verkalýðshreyfingin muni ekki standa aðgerðarlaus hjá, ef af þessu verður:
„Það hlýtur að vera krafa verkalýðshreyfingarinnar og sjóðfélaga lífeyrissjóðanna að eigendur félagsins verði ekki verðlaunaðir frekar með fjárfestingum lífeyrissjóða í útboði félagsins. Við því verður harkalega brugðist ef svo verður!“
Eigendur félagsins eiga rétt á árangurstengdri greiðslu og yrði eignarhlutnum ætlað að mæta því uppgjöri, en endanleg upphæð ræðst af genginu sem fæst við útboð á nýjum hlut í félaginu í næsta mánuði.