Swedbank, einn stærsti banki Norðurlanda, hefur fjárfest fyrir 3 milljónir evra, eða sem nemur 371 milljón króna, í íslenska fjártæknifyrirtækinu Meniga. Til viðbótar við fjárfestinguna hefur bankinn hafið innleiðingu á snjallsíma- og netbankalausnum Meniga til að bjóða öllum viðskiptavinum bankans persónulegri notendaupplifun. Þetta kemur fram í tilkynningu.
Innleiðingin mun leiða af sér nýja og endurbætta snjallsíma- og netbankalausn þar sem viðskiptavinir bankans munu geta einfaldað og haldið betur um heimilisfjármálin sín með því að fá persónulega yfirsýn og tilkynningar frá Meniga-kerfinu.
„Við erum mjög ánægð að bjóða Swedbank velkomin sem fjárfesti í Meniga og hlökkum til að vinna með bankanum til að endurhanna snjallsíma- og netbankaumhverfi bankans. Við erum virkilega spennt yfir þeim metnaði sem Swedbank hefur sýnt til að bjóða viðskiptavinum sínum betri þjónustu og notendaupplifun. Við teljum það sýna mikið traust í Meniga að Swedbank hafi ákveðið að fjárfesta í fyrirtækinu ásamt því að velja okkur sem réttu lausnina fyrir bankann.“
segir Georg Lúðvíksson, forstjóri og einn stofnandi Meniga.
„Við sjáum Meniga sem rétta samstarfsaðilann til að veita viðskiptavinum okkar persónulegri notendaupplifun og mun betri yfirsýn yfir fjármálin sín. Við erum einstaklega ánægð með fjárfestinguna og samstarfið.”
segir Lotta Lovén, framkvæmdastjóri snjallsíma- og netbankalausna Swedbank.
Fyrr á árinu samdi Meniga við BPCE, annan stærsta banka Frakklands.
Meniga var stofnað árið 2009 og eru starfsmenn í dag um 100 talsins. Hugbúnaður Meniga hefur verið innleiddur hjá yfir 70 fjármálastofnunum og er hann aðgengilegur yfir 50 milljón manns í 23 löndum. Meðal viðskiptavina Meniga eru margir stærstu banka heims, þeirra á meðal BPCE, Santander, Commerzbank, ING Direct og Intesa Sanpaolo.
Landsmönnum stendur til boða að nýta sér lausnir Meniga gjaldfrjálst á vefnum meniga.is eða í Meniga appinu fyrir iPhone og Android síma.