Björn Bjarnason, fyrrum ráðherra Sjálfstæðisflokksins, telur Dag B. Eggertsson ekki vera mann fólksins, ef marka má pistil hans á heimasíðu sinni. Þar fjallar Björn um hversu erfitt sé fyrir almennan borgarbúa að fá viðtal við borgarstjóra og vísar í frásögn Aldísar Steindórsdóttur í Morgunblaðinu, sem berst fyrir rétti geðfatlaðs föður síns.

Aldís þurfti að bíða í um fjóra mánuði eftir viðtali við umboðsmann borgarbúa:

„Um miðjan febrúar síðastliðinn óskaði Aldís eftir að fá að hitta Dag B. Eggertsson borgarstjóra. Henni var í staðinn boðið að ræða við framkvæmdastjóra þjónustumiðstöðvar Vesturbæjar, Miðborgar og Hlíða. Liðu nokkrar vikur þar til samtalið fékkst án þess að það skilaði nokkru,“

segir Björn.

„Þetta dæmi sýnir að almennur borgarbúi fær ekki fund með borgarstjóra. Hann er á annarri plánetu, boðar Miklubraut í stokk fyrir 21 milljarð og borgarlínu fyrir 70 milljarða. Borgarstjóri ver tíma sínum með lánardrottnum frekar en að gæta hags skattgreiðenda – skuldir á íbúa eru hvergi hærri en í Reykjavík og enn skal þeim safnað. Seilst er dýpra og dýpra í vasa kjósenda en vilji þeir kynna vanda sinn eða annarra er skellt á þá og látið reka á reiðanum.“

Þess má geta að til þess að fá áheyrn hjá borgarstjóra, þarf að fylla út umsókn sem finna má á heimsvæði borgarinnar, en reglulegir viðtalstímar borgarstjóra eru á miðvikudögum og eru samtals 15 mínútur hver.

Þar er tekið fram að gefa þurfi ítarlegar upplýsingar um það sem viðtalsbeiðandi óskar eftir að ræða, til að „unnt sé að meta“ viðtalsbeiðnina.