Í undirbúningi er sérframboð fólks sem lengi hefur fylgt Sjálfstæðisflokknum á Seltjarnarnesi. Þetta kemur fram í Morgunblaðinu. Skafti Harðarson er í forsvari hópsins, sem hann segir ósáttan við fjármálastjórn bæjarins. Þá segir hann alla „pólitíska forystu bókstaflega vanta“.
Skafti telur að bærinn sé að kosta of miklu til við byggingu hjúkrunarheimilis við Bygggarða á Seltjarnarnesi, en bærinn á að greiða 15% af byggingarkostnaði, sem er áætlaður um 1400 milljónir króna. Skafti telur einnig að reksturinn, sem verði á forræði ríkisins, verði of áhættusamur þar sem daggjöldin dugi tæpast fyrir rekstrinum.
Þá segir Skafti að kaup bæjarins á húsinu Ráðagerði, fyrir 100 milljónir, til hýsingar ýmiskonar menningarstarfsemi, hafi verið fráleit ráðstöfun, með vísun til stöðu bæjarsjóðs, sem rekinn var með 99 milljóna króna tapi á síðasta ári.
Skafti segir það skýrast um miðja viku hvort af framboðinu verði.
Í sveitastjórnarkosningunum árið 2014 fékk Sjálfstæðisflokkurinn fjóra fulltrúa, Samfylkingin tvo, Neslistinn einn, en Framsókn náði ekki inn manni.