Inga Sæland, formaður Flokks fólksins, skrifar einlæga stöðuuppfærslu á Facebook síðu sína í dag. Þar harmar hún þá tortryggni sem flokknum er sýnd, en segir hana skiljanlega, þar sem „við þekkjum ekkert annað en smjaður og fölsk fyrirheit stjórnamálamanna.“

Hún segir sinn flokk hafa gert miklu meira en lagt fram fyrirspurnir, hann hafi einnig lagt fram frumvörp. Hinsvegar verði að átta sig á því að flokkurinn sé í stjórnarandstöðu.

Hún segist vona að:

„..þið  hvettuð okkur frekar til dáða en að láta ítrekað líta út fyrir að við séum ekkert annað en hugsjónalausar afætur sem gleymum tilgangi okkar þegar markmiðinu var náð að komast á þing.“

Þá segir Inga að von sé á tveimur málum úr nefndum, annarsvegar um afnám á skerðingum vegna launatekna aldraðra og hinsvegar afnám á skerðingum styrkveitinga til kaupa á hjálpartækjum fyrir aldraða og öryrkja. Þá er Flokkur fólksins einnig með þingsályktunartillögu þess efnis að enginn fái lægri framfærslu en 300 þúsund krónur á mánuði, skattfrjálst.