Á 12 mánaða tímabili, frá mars 2017 til febrúar 2018, voru að jafnaði 17.097 launagreiðendur á Íslandi og hafði þeim fjölgað um 662 (3,9%) frá síðustu 12 mánuðum þar á undan. Á sama tímabili greiddu launagreiðendur að meðaltali um 184.300 einstaklingum laun sem er aukning um 8.400 (4,6%) samanborið við 12 mánaða tímabil ári fyrr. Þetta kemur fram á vef Hagstofu Íslands.

Í febrúar 2018 voru 1.727 launagreiðendur og um 24.700 launþegar í einkennandi greinum ferðaþjónustu, og hafði launþegum fjölgað um 700 (3%) samanborið við febrúar 2017. Þó að launþegum fjölgi enn í þeirri atvinnugrein þá hefur hægt á fjölguninni. Á sama tímabili hefur launþegum í heild fjölgað um 6.800 (4%).

Endurskoðun hagtalna
Tölurnar sem hér um ræðir eru bráðabirgðatölur. Þar sem byggt er á staðgreiðslugögnum getur verið vanmat í nýjustu tölum þegar launagreiðendur skila ekki inn upplýsingum tímanlega. Meðal annarra skekkjuvalda má nefna orlofsgreiðslur til fyrrverandi starfsmanna. Þegar nýjar tölur eru birtar verða jafnframt birtar endurskoðaðar tölur fyrir fyrri tímabil. Nánari lýsingu á skekkjuvöldum, áhrifum þeirra og endurskoðun birtra talna má finna í lýsigögnum og í talnaefni um endurskoðun hagtalna.

Áður birtar tölur hafa verið endurskoðaðar, þ.e. tekið tillit til nýrra upplýsinga um launagreiðslur og nýjustu upplýsinga um atvinnugreinaflokkun.

Heildarfjöldi launagreiðenda í janúar 2018 telst nú vera 17.248 og heildarfjöldi launþega 184.300. Fjöldi launþega jókst um 8.400 (4,7%) frá janúar 2017 til janúar 2018.

Þegar fréttatilkynning var gefin út í mars 2018 töldust vera 16.774 launagreiðendur og 183.000 launþegar í janúar 2018. Fjöldi launþega var þá talinn hafa aukist um 7.000 (4,0%) frá janúar 2017 til janúar 2018.

Aðrar hagtölur um svipað efni
Hagstofa Íslands gefur út rekstrar- og efnahagsyfirlit fyrirtækja. Yfirlitið byggist á skattframtölum fyrir tekjuárin 2002–2016 og gefur ítarlega mynd af stöðu einstakra atvinnugreina.

Hagstofa Íslands framkvæmir samfellda vinnumarkaðsrannsókn (VMR) allt árið um kring og birtir helstu niðurstöður (atvinnuþátttöku, fjölda starfandi, atvinnuleysi o.fl.) mánaðarlega og ítarlegri sundurliðun (s.s. starfshlutfall og vinnutíma eftir atvinnugreinum) árlega. Í VMR eru einnig upplýsingar um þá sem eru sjálfstætt starfandi og aðeins eru taldir með þeir sem eru, skráðir í Þjóðskrá og með fasta búsetu á Íslandi. Því er eðlilegt að tölur í þessari frétt séu ekki nákvæmlega þær sömu og í VMR. Tölum um fjölda launagreiðenda og launþega er fyrst og fremst ætlað að sýna þróun til skamms tíma og sveiflur innan árs.

Hafa verður í huga að í þessum tölum eru ekki upplýsingar um einyrkja sem eru með rekstur á eigin kennitölu og greiða sjálfum sér laun, en slíkt rekstrarform er algengt í byggingariðnaði, landbúnaði, hugverkaiðnaði og skapandi greinum svo dæmi séu tekin. Hagstofa hóf nýlega birtingu á heildarfjölda starfandi samkvæmt skráargögnum, þ.e. bæði launþegum og öðrum. Þar eru starfandi meðal annars flokkaðir eftir aldri, kyni og lögheimili.

Talnaefni
Einkennandi greinar ferðaþjónustu
Allar atvinnugreinar