Frelsisflokkurinn hélt kynningarfund fyrir framan Ráðhús Reykjavíkur í dag þar sem til stóð að afhenda Degi B. Eggertssyni borgarstjóra ýmsar táknrænar gjafir. Fundinum var ætlað að kynna stefnumál flokksins og var öllum fjölmiðlum boðið á staðinn.

Fáir voru í Vonarstræti þegar ljósmyndara DV bar að garði en þar mátti sjá Gunnlaug Ingvarsson, formann flokksins og borgarstjóraefni, standa fyrir aftan borð úr pappakössum og útskýra táknrænar gjafir sem afhenta átti borgarstjóra. Dagur B. Eggertsson borgarstjóri lét ekki sjá sig.

Meðal þess sem átti að gefa borgarstjóra var drullusokkur sem nota á til að hreinsa holræsi borgarinnar, hjólapumpu til að blása lífi í borgarmálin og rykgrímu til að verjast svifryki.

Aðaláhersla Frelsisflokksins er á útlendingamál og hefur formaðurinn líkt honum við Sanna Finna, danska Þjóðarflokkinn og Frelsisflokk Geert Wilders í Hollandi. Vill flokkurinn fækka kvótaflóttafólki, úthýsa hælisleitendum úr húsnæði Reykjavíkurborgar og rifta samningi um byggingu mosku í Sogamýri.