Í nótt voru opinberuð 15 minnisblöð James Comey,fyrrum forstjóra bandarísku alríkislögreglunnar, FBI. Þar má finna upplýsingar sem varpa ljósi á samskipti hans og Donald Trump, forseta Bandaríkjanna, sem rak Comey í maí í fyrra.

Frá því að upplýsingar úr ævisögu Comey láku út fyrir nokkrum vikum hafa samskipti Comey og Trumps verið með versta móti og kallaði Trump Comey versta forstjóra FBI frá upphafi og sakar hann um að leka upplýsingunum sjálfur.

Samkvæmt einu minnisblaðinu er fjallar um fund þeirra í Hvíta húsinu segir að Trump hafi beðið Comey um að hætta rannsókn sinni á gjörðum þjóðaröryggisráðgjafans Michael Flynn, en hann var grunaður um óeðlileg tengsl við áhrifamenn Í Rússlandi. Trump sagði að Flynn væri með „lélega dómgreind“, það hefði sést þegar hann svaraði ekki símtali frá þjóðarleiðtoga í janúar, sem ætlaði að óska Trump til hamingju með nýja embættið. Segir Comey að Trump hafi minnst á Flynn að fyrra bragði, Comey sjálfur hefði aldrei minnst á Flynn, eða rannsókn FBI á honum.

Í minnisblöðunum kemur fram vísbending þess efnis að þáverandi starfsmannastjóri Hvíta hússins, Reince Preibus, hafi gengið á Comey með hvort FBI væri að hlera samskipti Flynn, en Trump rak Flynn í febrúar í fyrra þar sem ástæðan var sögð sú að hann hefði logið varðandi samskipti sín við Rússa. FBI hafði þá þegar yfirheyrt Flynn vegna samskipta hans við sendiherra Rússlands í Bandaríkjunum og hafði varnarmálaráðuneytið einnig óttast að hann væri líklegur til að þiggja mútur.