Ögmundur Jónasson, fyrrverandi ráðherra, efast um gagnsemi og réttmæti uppljóstrana í kjölfar leyniupptökunnar á Klaustri. Í nýjum pistli á heimasíðu sinni ber Ögmundur þessar uppljóstranir saman við uppljóstranir Wikileaks og skrifar:

„Friðhelgin á sér margar hliðar. Ég er þannig mjög eindregið þeirrar skoðunar að Wikileaks hafi gert opnu lýðræðisþjóðfélagi gott með því að upplýsa um undirferli og ofbeldi hernaðarvelda, þar á meðal um stríðsglæpi þeirra í Írak og Afghanistan. Slíkt á alltaf og undir öllum kringumstæðum að upplýsa.

En hvað um iillmælgi um samþingmenn á Alþingi Íslendinga, orð sem látin eru falla – ansi mörg – á vínbar með palladómum, kvenfyrirlitningu og meinfýsni í garð fatlaðra einstaklinga? Allt tekið upp á segulband og birt í fjölmiðlum.

Jafnast þetta á við uppljóstranir Wikileaks, átti allt sem þarna var sagt heima í fjölmiðlum? Ég efast um það, meira að segja mjög svo. Eitt er víst að engum hefur þetta gert gott. Hvorki þeim sem töluðu né hinum sem um var rætt. En hvað með samfélagið almennt? Verður það betra fyrir vikið? Ég held ekki. Ákveðnir þættir kunna vissulega að eiga heima í fréttum, meint viðskipti með opinberar mannaráðningar nefni ég, en um það hefði mátt spyrja af öðru tilefni.“

Ögmundur segir síðan að þegar efni leyniupptökunnar var komið á svið Borgarleikhússins í uppfærslu þar hafi málið farið að taka á sig mynd gapastokks. Í lok pistils síns hefur Ögmundur uppi þessi viðvörunarorð:

„Minn spádómur er þessi: Ef við leggjum ekki heykvíslarnar fljótlega frá okkur þá er réttarríkið farið og í þess stað boðið upp á brauð og leika. 
Það eru ekki góð skipti.“