Andri Snær Magnason, rithöfundur og náttúruverndarforkólfur, finnur Bitcoin rafmyntinni flest til foráttu. Hann segir fyrirbærið vera bólu sem noti allt of mikla orku og gagnrýnir samning Landsvirkjunar við gagnaversfyrirtækið Etix Everywhere Iceland ehf., dótturfélag Etix Everywhere Borealis, um afhendingu 25MW til nýs gagnavers á Blönduósi.
Í niðurlagi færslu sinnar á Facebook við frétt Eyjunnar um samninginn, segir Andri Snær:
„Einu röklegu viðbrögðin við sturluðum heimi má finna í myndinni Woman at war / Kona fer í stríð.“
Í myndinni Kona fer í stríð, stundar aðalsöguhetja myndarinnar skemmdarverk á raflínum, í nafni umhverfisverndar.
Eyjan hafði samband við Andra Snæ og spurði hvort hann hefði áhyggjur af því hvort þessi orð hans yrðu verið túlkuð sem hótun eða réttlæting á skemmdarverkum:
„Ég myndi ekki segja að þetta sé hótun. Einu röklegu viðbrögðin við sturluðum heimi koma fram í enda myndarinnar, þegar aðalsöguhetjan ættleiðir barn í Úkraínu. Sá sem bjargar einu barni, bjargar heiminum. Það er það sem ég er að vísa til,“
segir Andri Snær.
Í færslu sinni segir Andri Snær að heimurinn sé alveg „óður“ í að fara til „fjandans“:
„Mikið vildi ég að Amor hefði skotið ör í rassinn á Orkumálastjóra um leið og hann ók yfir Sprengisand. Hér er gerður samningur um 25MW sem fer til fyrirtækis sem leitar að Bitcoin sýndarpeningum. Á heimsvísu fer meiri orka í að leita að Bitcoin® heldur en nemur orkuþörf Hong Kong eða Nýja Sjálands. Er betra að leita að BullGulli® hér með ,,hreinni orku“ frekar en í Kína með kolaorku? Í ljósi þess að þarna er hálf Hvalárvirkjun sem fer í BullGull® eða sem nemur tveimur Svartám þá er alveg ljóst að heimurinn er alveg óður í að fara til fjandans og ekkert virðist geta stöðva menn. Einu röklegu viðbrögðin við sturluðum heimi má finna í myndinni Woman at war / Kona fer í stríð.“
Hann segir Bitcoin vera botninn á heimsins mestu vitleysu:
„Það er algerlega ósannað hvort það sé nokkuð gagn að þessum sýndarpeningum, og þetta virðist vera bóla sem er að rísa og hníga og er skýrt dæmi um vitleysuna sem þrífst í heiminum. Og þegar orkuyfirvöld segja að það sé betra að reisa eitthvað hér en annarsstaðar, taka þeir ekki með í dæmið hversu uppfullur heimurinn er af óstjórnlegri vitleysu og Bitcoin er í rauninni botninn á þessari vitleysu.“