„Og nú erum við hjá VR í þeirri sérstöku stöðu að þurfa að útskýra fyrir Samtökum Verslunar og Þjónustu að Georg Bjarnfreðarson er ekki alvöru persóna heldur karakter sem skapaður er af Jóni Gnarr,“ segir Ragnar Þór INgólfsson, formaður VR, í yfirlýsingu sem hann birti á Facebook í dag.
Yfirlýsingin er svar við gagnrýni Margrétar Sanders og Andrésar Magnússonar hjá Samtökum verslunar og þjónustu, sem þau settu fram gegn auglýsingum VR þar sem Jón Gnarr bregður sér í gervi Georgs Bjarnfreðarsonar. Auglýsingarnar hafa mælst vel fyrir, en þau Margrét og Andrés höfðu áhyggjur af því að auglýsingarnar gæfa ekki rétta mynd af raunveruleikanum.
Sjá nánar: Andrés og Margrét segja herferð VR „alvarlega árás“
Ragnar Þór segir:
„Við gerð auglýsinga er þeirri tækni oft beitt, þegar koma þarf á framfæri þungum boðskap, að stilla honum upp í léttar umbúðir. Dæmi um slíkt eru daglegar skopmyndir dagblaða þar sem dregin er upp skrípamynd af oft alvarlegum atburðum. Og nú erum við hjá VR í þeirri sérstöku stöðu að þurfa að útskýra fyrir Samtökum Verslunar og Þjónustu að Georg Bjarnfreðarson er ekki alvöru persóna heldur karakter sem skapaður er af Jóni Gnarr. Nokkuð sem við héldum að hvert mannsbarn á Íslandi þekkti til. Einnig er verslunin Georgskjör ekki til í raunveruleikanum né vörulína sem kennd er við Bjarnfreði sem sagt er að þar sé á boðstólnum,“
segir Ragnar Þór, en greina má dass af kaldhæðni í yfirlýsingunni:
„Tekið skal sérstaklega fram að framkoma Georgs Bjarnfreðarsonar í Næturvaktinni endurspeglar á engan hátt þann raunveruleika sem starfsfólk bensínstöðva býr við né skilning VR á aðbúnaði starfsfólks almennt, heldur ekki því viðhorfi að starfsmenn geti á einhverjum tímapunkti ráðið yfirmönnum sínum bana eins og raunin varð í Dagvaktinni sem ég aftur ítreka að er uppspuni og leikið sjónvarpsefni.“
Þá útskýrir Ragnar hvert markmið auglýsinganna er, hafi það farið framhjá einhverjum:
„Í auglýsingum okkar um Georgskjör er dregin upp ýkt mynd af þeim málefnum sem brenna á okkar félagsmönnum og sem brýnt er að vinnuveitendur hafi í lagi. Auglýsingunum er einnig ætlað að vekja athygli á þeim réttindum sem náðst hafa fram vegna baráttu verkalýðshreyfingarinnar.
Við hjá VR höfum fjölda dæma um yfirgengilega og ólöglega framkomu vinnuveitenda gagnvart okkar félagsmönnum og því er undirtónn auglýsinganna ekki úr lausu lofti gripinn, en auðvitað er efninu pakkað inn sem skopi og vonum við sannarlega að meðal félagsmanna SVÞ leynist enginn Georg Bjarnfreðarson.“
Þá sendir Ragnar Samtökum verslunar og þjónustu létta pillu í lokin:
„Einnig eru áhyggjur SVÞ í mótsögn við þeirra eigin áherslur sem er að lengja dagvinnutímabil verslunarfólks þannig að dagvinna gildi frá kl.6 til kl.19 og að dagvinna nái yfir á laugardaga.“
