Óhætt er að segja að margir séu afar ósáttir við áform ríkisstjórnarinnar að setja á vegatolla. Jón Gunnarsson, formaður umhverfis- og samgöngunefndar Alþingis og fyrrverandi samgönguráðherra greindi frá því í Silfrinu fyrr í dag að samgönguáætlun verði afgreidd snemma á næsta ári. Hægt er að taka þátt í könnun neðst í fréttinni. Jón sagði í Silfrinu að full samstaða væri á meðal ríkisstjórnarflokkana. Vegtollar verða innheimtir á öllum stofnbrautum frá Reykjavík og í öllum jarðgöngum landsins. Það verður að teljast afar athyglisvert í ljósi þess hvað Katrín Jakobsdóttir sagði á síðasta ári. Þá sagði Katrín:
„Því hvað hefur Sjálfstæðisflokkurinn gert annað en að hækka skatta á almenning? Eða var það ekki Sjálfstæðisflokkurinn í félagi við Framsókn sem hækkaði virðisaukaskatt á matvæli á síðasta kjörtímabili? Er það ekki Sjálfstæðisflokkurinn og fylgitungl hans sem boða nú veggjöld í massavís?“
Á Kjarnanum var haft eftir Katrínu að þáverandi ríkisstjórn væri hugmyndasnauð, meðal annars í samgöngumálum:
„Það á bara helst að koma þeim í einkaframkvæmd og leggja á vegatolla einungis vegna þess að stjórnvöld treysta sér ekki til þess að byggja upp innviðina eins og vera ber.“
En nú er það í góðu lagi virðist vera, þegar flokkurinn er í ríkisstjórnarsamstarfi við Sjálfstæðisflokkinn. Hefur verið bent á að almenningur sé nú þegar búinn að greiða fyrir þá vegi sem á nú skyndilega að rukka fyrir að aka um og ekki séu aðrar leiðir í boði líkt og tíðkast erlendis, þar sem mögulegt er að greiða fyrir að fara sína leið á hraðbraut frekar en sveitaveg. Ríkisstjórnin stefnir hins vegar á að rukka fyrir sveitaveginn en ekki bjóða neitt í staðinn.
DV birtir í ljósi þessara tíðinda könnun þar sem lesendur geta sagt sína skoðun á fyrirhuguðum vegatollum ríkisstjórnarinnar. Bubbi Morthens var afar ósáttur við þessi tíðindi í Silfrinu í dag og sagði stutt og laggott:
„Við hjónin keyrum daglega í bæinn frá Kjós samtals 4 ferðir ertu ekki að grínast.“
Jakob Bjarnar Grétarsson blaðamaður á Vísi sá annan vinkil, þá í ljósi þess að nú stendur til að Bubbi Morthens verði úthlutað heiðurslaun listamanna frá ríkinu, en Jakob tjáði sig á Facebook-vegg Bubba og sagði:
„Helv…. þar fóru heiðurslaunin fyrir lítið. Ríkið gefur með annarri og tekur með hinni.“