Össur Skarphéðinsson, fyrrverandi formaður og utanríkisráðherra Samfylkingarinnar, dáist að forsætisráðherra Breta, Theresu May, þó svo hún komi úr Íhaldsflokknum, en hún stóðst atlögu eigin flokks í atkvæðagreiðslu um vantraust gegn henni í vikunni. Alls 117 þingmenn greiddu atkvæði gegn henni, en 200 þingmenn stóðu með henni. Hún tilkynnti þó í kjölfarið að hún myndi ekki vera í forsvari flokksins í næstu þingkosningum, sem eru fyrirhugaðar 2022. Þrjú ár eru hinsvegar langur tími í pólitík, ekki síst í Bretlandi.
Össur segir íhaldið ekki hafa geta hugsað sér þá leiðtoga sem í boði væru ef May hefði stigið til hliðar:
„Varla er hægt annað en dást að þreki og seiglu Theresu May. Hún kemur úr vonlausri samningaferð um Evrópu, tekst þegar í stað á við vantraust á einum degi, og sigrar – þó vissulega komi hún haltrandi út. Ekki er liðinn dagur þegar hún er mætt í vonlítinn leiðangur í Brussel. – Frá sjónarhóli þjóðarhagsmuna var það hins vegar “det gale vanvid” að efna til leiðtogakjörs á svo viðkvæmri stundu. Það sýnir að Brexit-sinnar hafa orðið viðskila við veruleikann. -Vissulega má segja að May hafi átt sigur vísan í vantraustinu. Meirihluti þingmanna Íhaldsflokksins kaus á sínum tíma gegn Brexit, eða vilja mjúka lendingu, og gátu ekki hugsað sér atburðarás þar sem talsverðar líkur voru á að annar hvor forystumanna hinnar hörðu Brexit-fylkingar, Boris Johnson fyrrum utanríkisráðherra, eða Dominic Raab sem sagði af sér sem Brexit-ráðherra, hefðu á endanum orðið leiðtogar.“
Össur segir ákvörðun May um að bjóða sig ekki fram að nýju hafi tryggt henni stærri sigur en ella:
„Í gríðarlegri kastþröng má líka segja að May hafi kippt fótum undan andstæðingum í þingflokknum með því örþrifaráði að gera uppskátt að hún hyggist ekki leiða flokkinn í kosningum eftir þrjú ár. Af umhyggju fyrir þingsætum sínum gátu fæstir hugsað sér það. Þetta loforð tryggði henni því stærri sigur en ella – en réði tæpast úrslitum. Um leið má segja að hún hafi endanlega gengið frá leiðtogadraumum helsta andstæðings síns, Boris Johnson. Hann er litríkur pópúlisti en meingallaður stjórnmálamaður. Í dag eru meiri líkur á að aðildarsinninn Jo, bróðir hans, verði fremur leiðtogi en hann – án þess að því sé endilega spáð hér. Með 117 þingmenn á móti stefnu sinni er hins vegar mjög þungt fyrir hana að ná fram nokkrum breytingum í Brussel.“
Össur tekur fram að hann hafi aldrei verið mikill aðdáandi May, en hún eigi þó virðingu hans alla:
„Mér þótti May aldrei sérlega geðfelldur stjórnmálamaður, og fannst hún reka vonda stefnu sem innanríkisráðherra. Hvorki ég né aðrir geta þó tekið frá henni það sem hún sannarlega á skilið: Respekt fyrir ótrúlegu úthaldi og elju. Það er ekki til uppgjöf í þessari konu.“