Fylgi Miðflokksins hrynur um sjö prósentustig í nýrri könnun MMR á fylgi flokka, fylgið er farið úr 13,1% niður í 5,9%. Á sama tíma bætir Framsóknarflokkurinn við sig fimm prósentustigum frá síðustu mælingu.

Miðflokkurinn mælist þó inni á þingi, ólíkt könnun Zenter frá því í byrjun mánaðarins.

Sjálfstæðisflokkurinn mældist með stuðning 22,1% landsmanna í könnun MMR sem framkvæmd var dagana 5.-11. desember. Fylgi Sjálfstæðisflokksins jókst um eitt prósentustig frá síðustu mælingu sem lauk 21. nóvember. Samfylkingin mældist með 16,9% fylgi, sem er svipað fylgi og flokkurinn mældist með í síðustu könnun. Píratar bættu rúmlega þremur prósentustigum við fylgi sitt frá síðustu könnun og mældust með 14,4% fylgi. Þá bættu Vinstri græn rúmlega tveimur og hálfu prósentustigi við fylgi sitt.

Stuðningur við ríkisstjórnina jókst lítillega en 40,3% sögðust styðja ríkisstjórnina nú samanborið við 39,9% í síðustu mælingu.

Fylgi Vinstri grænna mældist nú 12,9% og mældist 10,3% í síðustu könnun.
Fylgi Framsóknarflokks mældist nú 12,5% og mældist 7,5% í síðustu könnun.
Fylgi Viðreisnar mældist nú 8,5% og mældist 8,6% í síðustu könnun.
Fylgi Miðflokks mældist nú 5,9% og mældist 13,1% í síðustu könnun.
Fylgi Flokks fólksins mældist nú 4,2% og mældist 7,6% í síðustu könnun.
Fylgi annarra flokka mældist 2,6% samanlagt.