Inga Sæland, formaður Flokks fólksins, skorar á þingmenn að gefa 181 þúsund króna jólabónusinn sinn til góðgerðarmála, máli sínu til stuðnings veifaði hún peningaseðlum í ræðustól Alþingis.
Guðmundur Ingi Kristinsson, þingmaður Flokks fólksins, sagði í síðustu viku að bónusinn væri of hár og lagði til að þeir sem lifa á lífeyrislaunum fái þann jólabónus sem þingmenn fá og þingmenn fái þann jólabónus sem lífeyrisþegar fá. Hann og Inga lifðu á örorkulífeyri áður en þau settust á þing.
Sjá einnig: Guðmundur Ingi segist fá of háan jólabónus frá ríkinu
Inga sagði í umræðum um störf þingsins í dag að hún ætli að gefa sinn jólabónus til fátækra. „Hvað ætlum við að gefa þjóðinni okkar í jólagjöf?,“ spurði Inga þingmenn.
Hún sagði að kona frá góðgerðarsamtökum hefði haft samband við sig í morgun og sagði hún Ingu að til hennar hefðu leitað 120 manns sem þáðu gjafakort frá Bónus. „Hún sagði að það væri sárara en tárum taki að horfa á upp á hvað í rauninni eymdin hefur vaxið ótrúlega mikið á árinu 2018,“ sagði Inga.
Hún veifaði svo peningaseðlunum: „Ég veit hvað ég ætla að gefa í jólagjöf. Ég skal sýna ykkur það, háttvirtur forseti. Ég tók út jólabónusinn minn og ég skora á alla hér að gera slíkt hið sama. Því við höfum efni á því að kaupa gjafakort fyrir fátækt fólk og rétta það til góðgerðarsamtaka og ganga á undan með góðu fordæmi. Gleðileg jól.“
Heyra má svo þingmenn segja Heyr heyr!
Hér má sjá ræðu Ingu í heild sinni: