Ekki verður fundað um sendiherraskipan þáverandi utanríkisráðherra, Gunnars Braga Sveinssonar, á þeim Árna Þór Sigurðssyni og Geir H. Haarde, fyrir stjórnskipunar- og eftirlitsnefnd Alþingis í dag líkt og til stóð. Nefndin hafði boðað Gunnar Braga og Sigmund Davíð Gunnlaugsson, Miðflokki, og Bjarna Benediktsson og Guðlaug Þór Þórðarson, Sjálfstæðisflokki, vegna þeirra ummæla sem féllu um sendiherramálið í Klaustursupptökunum.
Guðlaugur Þór er erlendis og hafði boðað forföll, en þeir Sigmundur Davíð og Gunnar Bragi hafa ekki svarað ítrekuðum boðum nefndarinnar á fundinn og hafa heldur ekki svarað fyrirspurnum fjölmiðla. Hófst fundurinn klukkan 10 í morgun, en sökum einbeitts skrópvilja forystu Miðflokksins, að því er virðist, mun málið dragast frekar á langinn en nýr fundur hefur verið settur á dagskrá í janúar.
Eyjan greindi fyrst frá því að á Klaustursupptökunum heyrðist Gunnar Bragi tala um með hvaða hætti hann skipaði þá Árna Þór og Geir sendiherra og virtist hann líta svo á að hann ætti greiða inni hjá Sjálfstæðisflokknum vegna skipunar Geirs. Hafa allir hlutaðeigandi neitað fyrir þessa fléttu, þar á meðal Katrín Jakobsdóttir forsætisráðherra, en Gunnar segir á upptökunum að hann hafi tryggt þögn Katrínar vegna skipan Geirs. Ekki kemur fram með hvaða hætti sú trygging fór fram, en Gunnar Bragi sagði daginn eftir að fréttin birtist um málið, að hann væri enn vongóður um að hljóta sendiherrastöðu, hann teldi sig geta orðið góðan sendiherra.
Síðar tók Guðlaugur Þór Þórðarsson skýrt fram, að Gunnar Bragi yrði ekki sendiherra.
Miðflokkshluti sexmenninganna á Klausturbarnum hefur krafist rannsóknar Persónuverndar á málinu og hefur dómari kallað uppljóstrarann Báru í skýrslutöku vegna málsins, en sú ákvörðun dómara virðist standa á lagalegum brauðfótum, samkvæmt Friðriki Árna Friðrikssyni Hirst, lögmanni og framkvæmdastjóra Lagastofnunar Háskóla Íslands, sem segir að Bára geti ekki verið vitni í eigin máli.
