Í dreifingu um alnetið fer nú sem eldur í sinu mynd sem sýnir fyrirhugaðar skattahækkanir ríkisstjórnarinnar úr fjárlögum 2018. Eru skattahækkanirnar sagðar í boði forystu Sjálfstæðisflokksins, sem fer með fjármála- og efnahagsráðuneytið.
Eru þær sagðar bætast við þær ríflega 50 skattahækkanir sem Sjálfstæðisflokkurinn hafi lögfest síðan 2013.
Jæja-hópurinn hefur dreift myndinni, en hann hefur skipulagt ýmis mótmæli í gegnum tíðina.
Katrín Jakobsdóttir forsætisráðherra, virtist höggva í sama knérunn, á landsfundi VG í október 2017:
„Það þarf að byggja upp innviðina um land allt. Auka raforkuöryggi um allt land, bæta samgöngur eða fjarskipti. Við getum gert það og við eigum að gera það. Gerum betur. Kæru vinir, hugmyndasnauðir hægrimenn munu halda því fram að þetta sé ekki hægt; það sé bara ekki til nóg af peningum. Hvernig? segja þeir. Hver á að borga? Þarf ekki að hækka skatta á almenning og fyrirtæki til að standa undir þessari stefnu?
Og reyndar eru þeir þegar byrjaðir með hræðsluáróður um skattahækkanir vinstrimanna. Sjálfur skattaflokkurinn. Því hvað hefur Sjálfstæðisflokkurinn gert annað en að hækka skatta á almenning? Eða var það ekki Sjálfstæðisflokkurinn í félagi við Framsókn sem hækkaði virðisaukaskatt á matvæli á síðasta kjörtímabili? Er það ekki Sjálfstæðisflokkurinn og fylgitungl hans sem boða nú veggjöld í massavís? Er það ekki Sjálfstæðisflokkurinn sem ætlaði að hækka virðisaukaskatt á ferðaþjónustu? Sjálfstæðisflokkurinn getur lítið sagt um aðra. Hann er skattaflokkur. En við munum ekki hækka skatta á almenning í landinu heldur munum við reka sanngjarna skattastefnu,“
sagði Katrín.
Athyglisvert er að Katrín nefnir veggjöldin sérstaklega, sem VG ályktaði gegn á landsfundi sínum. Nú veitir Katrín ríkisstjórn sem boðar veggjöld, forsæti.
Einhverjir hafa bent á að þrátt fyrir loforð Sjálfstæðisflokksins um lækkun skatta í aðdraganda kosninga, virðast skattarnir hinsvegar hækka eftir að flokkurinn kemst í ríkisstjórn.
Viðskiptaráð birti í febrúar yfirlit yfir allar skattabreytingar frá árinu 2007, þar sem fram kom að alls höfðu 267 skattabreytingar verið gerðar á þeim tíma, eða um um 24 breytingar á ári.
Alls 200 breytingar voru skattahækkanir, aðeins 67 voru skattalækkanir.
Meðal skattahækkana voru:
Um síðustu áramót gerðu stjórnvöld 22 breytingar á íslensku skattkerfi. 19 þeirra fólu í sér skattahækkanir en aðeins í þremur tilvikum voru skattar lækkaðir.
Skattar hafa því verið hækkaðir þrisvar sinnum fyrir hverja skattalækkun frá 2007.
Ágætlega var fjallað um fyrirætlanir ríkisstjórnarinnar í skattamálum í stjórnarsáttmálanum, en þar mátti lesa fyrirheit um sjö ólíkar skattalækkanir á móti tveimur til hækkunar.
„Þegar nýtt fjárlagafrumvarp var birt nú um síðustu áramót kom þó í ljós að staðið var við báðar breytingarnar sem boðaðar höfðu verið til hækkunar en einungis eina af sjö til lækkunar. Það er því ljóst að stjórnvöld eiga ekki í neinum vandræðum með að standa við fyrirheit um skattahækkanir, en þegar kemur að skattalækkunum er einhver tregða til staðar,“
segir í umfjöllun Viðskiptaráðs.
