Frá því að ríkisstjórn Katrínar Jakobsdóttur tók við völdum fyrir um ári síðan, hefur utanríkisráðuneytið greitt alls 126,9 milljónir fyrir 40 verksamninga um aðkeypta ráðgjöf, sérverkefni og verkefnastjórn. Þetta kemur fram í svari Guðlaugs Þórs Þórðarsonar utanríkisráðherra, við fyrirspurn Sigmundar Davíðs Gunnlaugssonar, formanns Miðflokksins.
Hæsta greiðslan er 20,3 milljónir sem fór til almannatengslafyrirtækisins Burson-Marsteller, sem starfar í 110 löndum, en er með höfuðstöðvar í New York. Samningurinn við fyrirtækið var um ráðgjöf og þjónustu við ríkisstjórnina um orðspor Íslands erlendis, svo sem greiningarvinna, almannatengsl og fjölmiðlavöktun. Fyrirtækið hefur starfað talsvert fyrir íslenskt stjórnvöld frá árinu 2010 vegna Icesave deilunnar, makríldeilunnar, og annarra mála sem kafist hafa ráðgjafar.
Næsthæsta greiðslan er 11 milljónir, sem fór til ÍSOR vegna rannsókna og ráðgjafar vegna jarðhitaverkefnis í Austur-Afríku og ráðgjafar vegna verkefna Alþjóðabankans.
Þá fékk Geir Oddsson, sem var tímabundinn starfsmaður/ráðgjafi í Norðurlandamálum vegna formennsku Íslands í Norrænu ráðherranefndinni 2019, 9,6 milljónir fyrir sín störf.
Susan Martin fékk 7,2 milljónir vegna undirbúnings heræfingar, varnaræfingarinnar Trident Juncture 2018.
Þá fékk Magnús Jóhannesson 5,5 milljónir vegna ráðgjafar í Norðurslóðamálum.
Björn Bjarnason og starfshópur hans um kosti og galla EES-samningsins eru einnig á lista utanríkisráðuneytisins. Hinsvegar er ekki komin ákvörðun frá þóknunarnefnd um laun þeirra.
