Vegtollar verða innheimtir á öllum stofnbrautum frá Reykjavík og í öllum jarðgöngum landsins. Þetta mun gerast ef breytingartillaga við samgönguáætlun verður samþykkt á Alþingis, það gæti gerst fyrir lok vikunnar. Sigurður Ingi Jóhannsson samgönguráðherra mælti gegn vegtollum hér á landi þegar Jón Gunnarsson var samgönguráðherra. Nú þegar Sigurður Ingi er kominn í ráðuneytið telur hann þetta vera nauðsynlegt vegna þess að tekjur ríkisins af bensín- og dísilolíu munu fara hratt lækkandi næstu ár og þær tekjur muni þá ekki duga fyrir þeim vegaframkvæmdum sem almenningur vilji. Með því að taka upp vegatolla verði einnig hægt að flýta framkvæmdum.
Jón Gunnarsson er nú formaður umhverfis- og samgöngunefndar þar sem málið er nú til umfjöllunar. Jón sagði í samtali við DV þegar hann var samgönguráðherra að hann ætti ekki von á að gjaldið yrði hærra en 400 krónur og að starfshópurinn sem var þá að störfum hafi aðallega verið að skoða þrjár leiðir inn og út af höfuðborgarsvæðinu: „Það eru leiðirnar austur fyrir fjall að Selfossi, norður að Borgarnesi og suður að Keflavíkurflugvelli. Meginleiðirnar inn og út úr höfuðborgarsvæðinu á þessu svæði. Þar sem umferðin er mest og slysatíðnin hæst,“ sagði Jón við DV.
Þegar vegtollar voru til umræðu sumarið 2017 bjó Eyjan til tvö kort á mögulegum staðsetningum vegtollanna og leiðunum sem hægt væri að fara til að þess að sleppa við þau. Erlendis tíðkast það oftast að hægt sé að fara leiðir framhjá tollahliðum en svo virðist sem hér á landi verði ekki hugsað út í það. Jón talaði um á sínum tíma að Krýsuvíkurleiðin yrði opin, þá yrði hægt að keyra framhjá hugsanlegu tollahliði til Suðurnesja og á Suðurland.
Rauðu punktarnir merkja tollahlið. Grænu línurnar merkja mögulegar leiðir fram hjá tollahliðunum.
Ef svo fer að tollhliðin á austur- og norðurleiðinni verði handan afleggjaranna til Nesjavalla og Þingvalla þá bætast við fleiri möguleikar en að öllum líkindum verður þá aftur byrjað að rukka í Hvalfjarðargöng: