Hætta er á það verði offramboð á nýbyggðum íbúðum og það sé spurning hverjir eiga að kaupa allt það húsnæði sem sé á leið á markað. Þetta er mat hagfræðideildar Landsbankans sem kemur fram í Hagsjá bankans. Ekki kemur fram í Hagsjá hvað muni gerast ef of margar íbúðir verða byggðar.
Mikið hefur verið rætt um hátt húsnæðisverð hér á landi og neyð fólks að verða sér út um íbúð. Lausnir á húsnæðisskortinum var hluti af stefnuskrám flestra ef ekki allra stjórnmálaflokka fyrir síðustu þing- og sveitarstjórnarkosningar. Málið er nú á samningaborði verkalýðshreyfingarinnar, atvinnurekenda og stjórnvalda.
Staðan virðist ekki vera slæm miðað við Hagsjá Landsbankans, þar er vitnað í greiningu Capacent um fjölda íbúa í hverri íbúð, þar var talan 2,45 íbúi á hverja íbúð hér á landi en á bilinu 1,9 til 2,2 á hinum Norðurlöndunum. Telur Landsbankinn að þar sem húsnæði hér á landi sé almennt stórt þá sé varasamt að byggja ákvarðanir á slíkum samanburði.
Er einnig vitnað í tölur Capacent um að það þurfi að byggja 15 þúsund íbúðir á næstu árum og tölur Samtaka iðnaðarins um að það verði lokið við 4.300 íbúðir á þessu og næsta ári. Er það mat bankans að komandi framboðið hjálpi mikið við að leysa stöðuna við samningaborðið.
„Það er ekki ólíklegt að mikið framboð sé og verði á íbúðum sem fáir vilja og enn færri geta keypt. Á fyrstu 10 mánuðum þessa árs var meðalstærð nýrra seldra íbúða um 103 m2 og meðalverð á fermetra um 521 þús. kr. Verð fyrir meðalíbúð var því tæpar 54 m.kr. sem er töluvert hærri upphæð en margir ráða við,“ segir í Hagsjánni.
Ekki kemur fram í Hagsjá hvað muni gerast ef of margar íbúðir verða byggðar: „Miðað við þessa stöðu er ekki hægt að útiloka að á næstu árum verði offramboð á nýbyggðum íbúðum. Verði farið út í miklar nýbyggingar á húsnæði sem er talið henta til þess að leysa þau vandamál sem verið er að ræða í kjarasamningum stendur sú spurning eftir hverjir eigi að kaupa allt það húsnæði sem nú er á leið inn á markað.“