Samgönguáætlun Sigurðar Inga Jóhannssonar, formanns Framsóknarflokksins, gerir ráð fyrir veggjöldum til að fjármagna ýmis verkefni Vegagerðarinnar. Um þetta er nú rætt og ritað og ekki allir á eitt sáttir, segja þetta skattpíningu og þaðan af verra.
Jón Gunnarsson, fyrrverandi samgönguráðherra Sjálfstæðisflokksins, skipaði starfshóp í sinni tíð sem lagði til að veggjöld yrðu tekin upp á helstu leiðum til og frá Reykjavík, til fjármögnunar á uppbyggingu helstu vega.
Sigurður Ingi sló þessar hugmyndir forvera síns í starfi um veggjöld og tollahlið strax út af borðinu í upphafi stjórnarsamstarfsins fyrir um ári síðan. Nú er hinsvegar komið annað hljóð í strokkinn, enda skipast veður skjótt í lofti í pólitík.
Þannig er samgönguáætlun formanns Framsóknarflokksins í algerri þversögn við ályktun Framsóknarflokksins frá því á landsþingi í mars síðastliðnum, þar sem kom skýrt fram að flokkurinn hafnaði tollhliðum á núverandi þjóðvegum.
Hún gengur einnig gegn ályktunum Vinstri grænna frá því í október í fyrra, þar sem hugmyndum um uppbyggingu grunnvegakerfis byggðum á vegatollum, er hafnað.
Jón Gunnarsson, sem sat í umhverfis- og samgöngunefnd fyrir Sjálfstæðisflokkinn, tók við formennsku nefndarinnar í kjölfar Klaustursmálsins, þegar Bergþór Ólason vék af þingi. Í kjölfarið lagði meirihluti nefndarinnar til breytingartillögu við samgönguáætlunina, þess efnis að vegtollar yrðu innheimtir á stofnbrautum frá Reykjavík og öllum jarðgöngum landsins.