„Íslenska þjóðfylkingin mun þegar í stað, komist flokkurinn til áhrifa, draga til baka undirskrift Íslands að flóttamannasáttmála Sameinuðu þjóðanna sem núverandi ríkisstjórn hefir ákveðið að skrifa undir. Það er skoðun flokksins að þessi undirskrift sé ólögleg enda brjóti hún í bága við stjórnarskrá um fullveldi Íslands.“
Þetta segir í fréttatilkynningu frá Íslensku þjóðfylkingunni. Þar er ítrekað að komist flokkurinn til áhrifa, muni hann einnig segja upp Schengen samkomulaginu og endurskoða samninginn um EES þar sem samningarnir brjóti báðir í bága við stjórnarskrá Íslands, að mati flokksins.
Þá er tekið fram á heimasíðunni að komist flokkurinn til áhrifa, muni hann einnig ógilda þriðja orkupakka ESB, verði hann samþykktur af núverandi ríkisstjórn.
Ekki er tekið fram hvernig flokkurinn ætli að komast til áhrifa, en flokkurinn bauð ekki fram í síðustu Alþingiskosningum, þar sem í ljós kom að undirskriftir á meðmælendalistum voru falsaðar. Í kjölfarið var hætt við framboð.
Flokkurinn bauð ekki fram í Reykjavíkurkjördæmunum tveimur árið 2016, sökum deilna innan flokksins. Hann hlaut 0,2% atkvæða í Alþingiskosningunum það ár.
Þá fékk hann alls 125 atkvæði, eða 0,2 prósent, í sveitarstjórnarkosningunum í maí síðastliðinn, í Reykjavík.
Íslenska þjóðfylkingin var stofnuð 2016, en Hægri grænir, sem buðu fram árið 2013, sameinuðust þá flokknum. Flokkurinn berst gegn fjölmenningu, moskum og hverskyns Evrópusamstarfi, með áherslu á verndun íslensks fullveldis og þjóðmenningu.