Álagning olíufélaganna á bensín er tíu krónum hærra á lítra nú en í upphafi ársins. Það er fimm krónum hærra en meðalálagning ársins, samkvæmt útreikningum Félags íslenskra bifreiðareigenda. Meðalálagningin í nóvember var fjórum krónum hærri en í október. Framkvæmdarstjóri FÍB, Runólfur Lárusson, sagði við RÚV að lækkun á verði hérlendis fylgdi ekki heimsmarkaðsverðinu á hráolíu:
„Það sem við höfum gagnrýnt er að hér er fákeppnin með þeim hætti að það sér enginn tækifæri í því þegar heimsverðið lækkar. Það var ekki fyrr en fjölmiðlar fóru að fjalla um þetta að félögin lækkuðu verðið. Freistingin um að skila ekki verðlækkuninni til neytenda er alltaf til staðar í svona fákeppnisumhverfi.“
Vilhjálmur Birgisson, formaður Verkalýðsfélags Akraness, segir þetta óþolandi fyrir neytendur og bendir á að verið sé að hafa stórfé af almenningi:
„Þetta er gjörsamlega ólíðandi að lækkun á heimsmarkaðsverði sé ekki skilað til neytenda eins og vera ber vegna fákeppni á olíumarkaði, en í þessari frétt kemur fram að álagning olíufélaganna sé 10 krónum hærri en í upphafi árs. Hvað þýðir það fyrir neytendur að olíufélögin séu að taka 10 krónum hærri í álagningu miðað við upphaf ársins, jú það þýðir að miðað við að flutt sé um 180 milljónir lítrar af 95 oktana bensíni að verið sé að hafa um 2 milljarða af neytendum á ársgrundvelli! Óþolandi.is.“
Þrátt fyrir þetta segja greiningardeildir bankanna að fallandi olíuverð á heimsmarkaði skili sér sennilega í lægra bensínverði, styðji gengi krónunnar og stuðli að minni verðbólgu.