„Ég legg til að við gefum Margréti drottningu gott klapp fyrir að hafa haldið út í þessum kulda og roki,“ sagði Katrín Jakobsdóttir undir lok setningar Fullveldishátíðarinnar við Stjórnarráðshúsið núna áðan.
Fáir staðir í Reykjavík henta líklega verr fyrir útihátíðir á þessum degi en einmitt Lækjargatan. Eftir henni stendur hinn kunnuglegi vindstrengur sem kemur yfir Esjuna í norðanátt, kaldur og ágengur.
Nú er komið í ljós að nýbyggingarnar nær höfninni veita lítið skjól fyrir þessari átt. Hún mun halda áfram að ríkja eins og hún hefur gert frá alda öðli.
Þetta var ljómandi hátíðleg athöfn á sinn hátt og ræður sem voru fluttar prýðilegar, en það var dálítið erfitt að láta ekki eftir sér að hlaupa í skjól.
Og eiginlega var maður farinn að hafa áhyggjur af drottningunni húfulausri í kuldanum. Við sjáum á myndinni hvað þeim er kalt, Margréti Þórhildi og Guðna Th.
Það var náttúrlega ekkert fjölmenni – kannski var þess aldrei von og sérstaklega ekki í slíkum kulda. Það gæti jafnvel verið að áhorfendurnir hafi verið færri en á þessum degi 1918.