Öryggisgler í stóra stiganum í Hörpu sprakk þegar hundruð stjórnenda Reykjavíkurborgar stóðu þar á sama tíma. Greint er frá málinu í Fréttablaðinu í dag. Atvikið átti sér stað á stjórnendadögum í Hörpu og segir Svanhildur Konráðsdóttir, forstjóri Hörpu, að það hafi líklegast verið meira en 300 stjórnendur hjá borginni staðið í stiganum þegar glerið sprakk.

„Mikill fjöldi fólks stóð í stiganum í drjúga stund og er ekki óeðlilegt að stiginn svigni örlítið undan slíkum fjölda sem var líklega meira en 300 manns. En hreyfingin er afskaplega lítil og engin ástæða til að hafa áhyggjur af því,“ hefur Fréttablaðið eftir Svanhildi.

Glerið liggur utan í og undir stóra stiganum í anddyri Hörpu. Svanhildur segir að engin hætta hafi skapast. Tveir samverkandi þættir hafi orðið til þess að glerið sprakk, hart efni hafi rekist í glerið sem og mikill fjöldi sem hafi verið í stiganum.