Það er titringur á Alþingi nú þegar fréttist hvernig þingmenn – að minnsta kosti sumir – tala hverjir um aðra. Máski hefur eitthvað svona alltaf tíðkast, en við lifum á tíma snjallsíma og samskiptamiðla – þessi tækni heftir ansi mikið frelsi fólks til að delera.
Og það verður að segjast eins og er að orðfærið í samdrykkjunni á Klausturbarnum var einstaklega óvandað. Og þau voru í raun í kallfæri frá Alþingishúsinu, þaðan og á umræddan bar eru ekki nema fáir metrar.
Í kvöld er þingveisla. Alþingismönnum er boðið í mat og drykk á Bessastaði til forsetans. Hefð er fyrir því að þessi veisla sé 1. desember, en nú er henni flýtt út af hátíðarhöldunum vegna fullveldisafmælisins.
Hvernig ætli stemmingin verði í veislunni í kvöld? Það tíðkast í þessum boðum að gestir geri vel við sig í mat og drykk – drekki jafnvel ótæpilega. Svo er venja að kveða vísur í þingveislum – hvernig ætli að gangi að finna rímorð við klúrheitin sem hljómuðu á Klausturbarnum? Verða einhverjir með hauspoka?
