Inga Sæland, formaður Flokks fólksins, er afar ósátt við framgöngu þingmanns Miðflokksins. Var hún af Bergþóri Ólasyni uppnefnd klikkuð kunta. Þá sagði Karl Gauti Hjaltason, þingmaður Flokks fólksins, um formanninn sinn:
„Ólafur er örugglega sammála mér að Inga Sæland getur þetta ekki.“
Voru þessi ummæli og fleiri látin falla á veitingastað en þeir vissu ekki að verið væri að taka þátt upp.
DV hefur undir höndum upptökurnar sem bárust nafnlaust á ritstjórn. Margt sem þar kemur fram er einkamál þingmannanna en annað á erindi við almenning. Viðstaddir voru Sigmundur Davíð Gunnlaugsson, Anna Kolbrún Árnadóttir og Bergþór Ólason, sem öll eru í Miðflokknum, og svo Ólafur Ísleifsson og Karl Gauti Hjaltason úr Flokki fólksins. Á upptökunum má heyra þingmenn úr bæði Flokki fólksins og Miðflokknum ræða mjög tæpitungulaust um stjórnmál og stjórnmálamenn. Var einnig verið að reyna að fá þessa tvo þingmenn Flokks fólksins til að ganga til liðs við Miðflokkinn, á fundinum var Ólafi boðið fjórum sinnum að verða þingflokksformaður Miðflokksins. Og þá fékk Inga Sæland fyrir ferðina og komu félagar hennar í Flokki fólksins henni ekki til varnar.
DV hafði samband við Ingu Sæland vegna ummæla Bergþórs. Hún vildi ekki tjá sig um þau að svo stöddu og kvaðst vilja kynna sér málið nánar og fá að melta framgöngu sinna þingmanna. Hún kvaðst hafa heyrt af tilboði Miðflokksins til Ólafs sem borið var upp fjórum sinnum. Gunnar Bragi Sveinsson tjáði sig við DV og sagði að um grín hefði verið að ræða og engin alvara að baki. Um þetta sagði Inga Sæland:
„Miðflokkurinn getur étið það sem úti frýs, við erum ekki að fara í eina sæng með þeim.“