Þorgerður Katrín Gunnarsdóttir, núverandi formaður Viðreisnar og fyrrverandi varaformaður Sjálfstæðisflokksins og menntamálaráðherra flokksins í ríkisstjórn um árabil, segir að samstarfsflokkar Sjálfstæðisflokksins í ríkisstjórn endi sem gólfmottur flokksins. Þorgerður Katrín sat sem sjávarútvegs- og atvinnuvegaráðherra fyrir hönd Viðreisnar í síðustu ríkisstjórn með Sjálfstæðisflokknum og Bjartri framtíð.

Þetta kom fram í þættinum Silfrinu á RÚV í dag þar sem tekist var hart á um stjórnmálin. Hildur Sverrisdóttir, þingmaður þingmaður Sjálfstæðisflokksins, sagði að þessi ummæli væru lítilsvirðandi gagnvart konum og ekki síst gagnvart Katrínu Jakobsdóttur forsætisráðherra, og fjarri raunveruleikanum.

Aðrir þátttakendur í umræðunum voru Lilja Rafney Magnúsdóttir þingmaður VG og Ólína Þorvarðardóttir fyrrverandi þingmaður Samfylkingarinnar. Tekist var hart en málefnalega á í þættinum.

Þorgerður Katrín gagnrýndi það sem hún kallaði „stefnulausa eyðslu“ í fjárlögum næsta árs á meðan Ólína Þorvarðardóttir gagnrýndi minni hækkun á framlögum til öryrkja en áætluð var. Lilja Rafney benti á að í tveimur fjárlögum hefði ríkisstjórnin aukið útgjöld samanlagt um 88 milljarða og farið í stóraukna uppbyggingu innviða og heilbrigðiskerfisins.

Bæði Þorgerður Katrín og Ólína Þorvarðardóttir gagnrýndu lækkun veiðigjalda og Ólína benti á að á sama tíma væri útgerðin að greiða út háar fjárhæðir í arð. Lilja Rafney sagði þennan málflutning villandi og benti á að um væri að ræða tekjutengingu veiðigjaldsins og það sveiflaðist því eftir afkomu fyrirtækjanna. Einnig væri gjaldið tengt við rauntekjur þannig að útgerðin væri ekki lengur að greiða skatt af tekjum þrjú ár aftur í tímann. Benti Lilja jafnframt á að meðalstórar og minni útgerðir hefðu verið að sligast undan auðlindagjaldinu í eldra fyrirkomulagi þeirra.