Það verður að segjast eins og er – jólakötturinn á Lækjartorgi er ótrúlega flottur. Með rauðar glyrnur, vígtennur, svartur og hniprar sig saman eins og til árásar. Og þegar dimmir er hann glæsilega upplýstur. Þetta er frábær hugmynd og útfærslan ekki síðri.

En mikið koma jólin snemma þetta árið. Hér í eina tíð var aldrei kveikt á Oslóarjólatrénu á Austurvelli fyrr en annan sunnudag í aðventu. Það var reglan. Jólatíðin byrjaði á aðventunni og svo stóðu jólin fram á þrettándan.

Nú byrjar þetta um miðjan nóvember með jólaljósum, jólabjór og jólahlaðborðum. Strax á annan í jólum eru margir komnir með gjörsamlega nóg og geta ekki beðið eftir því að rífa niður ljósin og skrautið.

En þá er mest þörf á því, í svartasta skammdeginu, fram að þrettándanum.

Það er auðvitað kaupmennskan sem gerir þetta svona tryllt. Jóladótinu er stillt upp í Kringlunni, Smáralind og Costco snemma í nóvember og þá hefst glymjandinn um að fólk sé að missa af einhverju – að það verði of seint ef það byrjar ekki strax.

Líklega stoðar lítt að tuða yfir þessu, það má þó andæfa aðeins. Í fyrra var talað um að yrðu „stærstu jól“ allra tíma, neyslan og kaupgleðin myndi slá öll met. Einhver svona umræða fer reyndar í gang um öll jól. Það er næstum eins og fólk sé að bregðast ef það stendur sig ekki sem kaupendur og neytendur. Og þá þarf auðvitað að byrja nógu snemma.

Ákveðnar vonir standa til að jólin verði ekki alveg jafn „stór“ í ár. Þau gætu samt orðið ljómandi góð.

,