Samkvæmt tillögum viðræðuhóps sveitarfélaga og ríkisins á að fjármagna Borgarlínu og stofnæðaframkvæmdir á höfuðborgarsvæðinu að hluta til með veggjöldum. RÚV greinir frá. Viðræðuhópurinn er skipaður fulltrúum sveitarfélaga á höfuðborgarsvæðinu, samgönguráðuneytisins og vegagerðarinnar, og var hlutverk þeirra að ná saman um fjármögnun, útfærslu og forgangsröðun framkvæmda í vegakerfinu á höfuðborgarsvæðinu, líkt og Borgarlínu.

Skýrslan verður kynnt opinberlega eftir helgi, en henni var skilað til ráðherra í gær. RÚV segist hafa heimildir fyrir því að enn sé ekki búið að útfæra hvernig kostnaður skiptist milli ríkis og sveitarfélaga, en þó sé lagt til að framkvæmdir verði að hluta til fjármagnaðar með veggjöldum.

Samkvæmt skýrslu stýrihóps frá í febrúar er áætlaður kostnaður um 83 milljarðar, en fyrsti áfangi Borgarlínu er 35 kílómetrar. RÚV segir að byrjað verði á svokallaðri austur-vestur leið á fyrsta fimm ára tímabilinu, sem og norður – suður leiðinni, sem gæti farið yfir fyrirhugaða brú yfir Fossvog, en ekki eftir Kringlumýrarbraut. Þá er ekki gert ráð fyrir að leggja götur í stokka á fyrstu fimm árunum, en mikið var talað um að leggja Miklubraut í stokk fyrir kosningar.

Gunnar Smári Egilsson, stofnandi Sósíalistaflokks Íslands, vekur athygli á frétt RÚV á Facebooksíðu sinni og virðist kalla eftir skýringum á útfærslu þess að fjármagna borgarlínu með veggjöldum:

„Og hvernig þá? Eiga strætófarþegar að borga vegtolla?“