fbpx
Mánudagur 10.desember 2018
Eyjan

Saga flugvalla og flugleiðsögu á Íslandi gefin út af ISAVIA

Ritstjórn Eyjunnar
Þriðjudaginn 20. nóvember 2018 19:55

Við afhendingu söguritsins. Frá vinstri: Arnþór Gunnarsson, höfundur bókarinnar, Björn Óli Hauksson, forstjóri Isavia, Sigurður Ingi Jóhannsson, samgöngu- og sveitarstjórnarráðherra, og Ragnhildur Hjaltadóttir, ráðuneytisstjóri.

Isavia hefur gefið út rit um sögu flugvalla og flugleiðsögu á Íslandi eftir Arnþór Gunnarsson sagnfræðing í tilefni merkra tímamóta í flugsögunni. Björn Óli Hauksson forstjóri Isavia færði Sigurði Inga Jóhannssyni samgöngu- og sveitarstjórnarráðherra fyrsta eintak bókarinnar á dögunum. Bókin er gefin út í rafbókarformi í opnum aðgangi á vef Landsbókasafnsins og Isavia en hún er einnig gefin út á prenti. Þetta kemur fram í tilkynningu.

Árið 2016 voru 70 ár liðin síðan Íslendingar fengu herflugvelli bandamanna í Reykjavík og Keflavík afhenta til eignar og hófu rekstur flugleiðsöguþjónustu á stórum hluta Norður-Atlantshafs. Árið 2017 voru líka þrjátíu ár liðin frá opnun Flugstöðvar Leifs Eiríkssonar sem olli straumhvörfum í farþegaflugi um Keflavíkurflugvöll. Flugsamgöngur og innviðir sem þeim tengjast eru undirstaða sívaxandi ferðaþjónustu sem orðin er einn mikilvægasti atvinnuvegur þjóðarinnar. Í tilefni þessara merku tímamóta ákvað Isavia að láta rita 70 ára sögu flugvalla og flugleiðsögu á Íslandi sem leikið hefur lykilhlutverk í samgöngusögu þjóðarinnar. Útgáfan á líka vel við á afmælisári 100 ára sjálfstæðis þjóðarinnar.

Aðgengileg öllum sem rafbók
Við hæfi er þegar opinbert fyrirtæki lætur skrá svo merka sögu að tryggja að hún nái til sem flestra landsmanna. Bókin er því gefin út í rafbókarformi í opnum aðgangi á vef Landsbókasafnsins og Isavia. Bókaútgáfan Opna bjó verkið til prentunar en bókin verður líka til sölu í bókaverslunum. Verkið telur nærri 550 blaðsíður og er allt hið glæsilegasta. Það er tileinkað öllu starfsfólki Isavia og forvera félagsins ásamt öðrum sem lagt hafa dygga hönd á plóginn við uppbyggingu og rekstur þeirrar mikilvægu þjónustu, sem stuðlaði m.a. að því að rjúfa einangrun í byggðum landsins.

Björn Óli Hauksson, forstjóri Isavia: „Ég vil þakka öllum sem komu að gerð verksins og sérstaklega höfundinum, Arnþóri Gunnarssyni sagnfræðingi, fyrir afar metnaðarfullt starf. Þarna er skráður mikilvægur hluti af sögu Íslands sem ekki má gleymast.“

Arnþór Gunnarsson (f. 1965) er sjálfstætt starfandi sagnfræðingur. Hann lauk BA prófi í sagnfræði frá Háskóla Íslands árið 1990 og MS-prófi í ferðamálafræði frá sama skóla árið 2011. Eftir Arnþór liggur fjöldi greina um sagnfræðileg efni í tímaritum, þar á meðal í Sögu, tímariti Sögufélagsins. Bækur eftir Arnþór eru m.a. Saga Hafnar í Hornafirði I–II (1997 og 2000), Fiskisagan flýgur (2005, meðhöfundur Kristinn Benediktsson ljósmyndari), Guðni í Sunnu. Endurminningar og uppgjör (2006), Á afskekktum stað (2011) og Lífæðin / Lifeline (2017, meðhöfundur Pepe Brix ljósmyndari).

Skoða vefútgáfu bókarinnar

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af