Þann 1. desember næstkomandi verða 100 ár liðin frá því að sambandslagasamningurinn tók gildi og Ísland varð frjálst og fullvalda ríki. Heilmikil dagskrá er víða um land vegna afmælisins og hefur verið allt þetta ár.
Alþingishúsið verður opnað almenningi af þessu tilefni og munu þingmenn og starfsmenn Alþingis veita leiðsögn um húsið og ræða við gesti, auk þess sem ljósmyndir, skjöl og valdar tilvitnanir úr umræðum á þingi um sambandslagasamninginn verða til sýnis. Aðgangur er ókeypis.
Steingrímur J. Sigfússon, forseti Alþingis, staðfesti við Eyjuna að kostnaður Alþingis vegna fullveldisdagsins væri áætlaður um tvær milljónir króna. Eitthvað af því kynningarefni sem gert væri af tilefni dagsins myndi þó einnig nýtast áfram.
Flestum er enn í fersku minni hátíðarfundur Alþingis á Þingvöllum í tilefni af aldarafmæli fullveldis Íslands. Þar var kostnaður áætlaður 45 milljónir, en endaði í tæpum 87 milljónum. Sá fundur var haldinn þann 18. júní, um miðjan dag og sóttu fáir gestir þann fund. Píratar sniðgengu fundinn og Helga Vala Helgadóttir, þingmaður Samfylkingarinnar, lét sig hverfa í mótmælaskyni þegar Pia Kjærsgaard, forseti danska þingsins, tók til máls.
Var því víða haldið á lofti, til dæmis á samfélagsmiðlum, að lítill sómi hefði verið af fundinum, ekki síst þegar miðað var við kostnaðinn og yrði hans ávallt minnst í neikvæðu ljósi.
Í ár ber 1. desember upp á laugardag og mun Alþingishúsið verða opið frá klukkan 13.30 – 18. Mun gestum gefast kostur á að ganga í gegnum sal Alþingis, sem jafnan er lokaður almenningi.