Sjóvá gaf frá sér afkomuviðvörun í gærkvöldi í kjölfar brunans á Hvaleyrarbraut í Hafnarfirði. Gunnar Smári Egilsson, stofnandi Sósíalistaflokks Íslands, segir þetta furðu sæta og kallar eftir nýjum lögum um vátryggingarstarfsemi, þar sem eigendur tryggingarfélaganna „mergsjúgi“ þau:

„Lið sem hefur komist yfir tryggingafélögin á undanförnum áratugum, örfáar fjárglæframanneskjur, hafa skrælt þau svo að innan með því að greiða sjálfu sér út tryggingasjóðina sem arð, að nú eru þetta svo veik félög að það má ekki kvikna í húsi án þess að félögin sendi frá sér afkomuviðvörun. Eitt tjón, sem þó getur aldrei orðið hærri útgreiðsla úr íslenski félögunum en 200 m.kr. vegna endurtrygginga; raskar rekstrarforsendum. Er ekki kominn tími á ný lög um vátryggingarstarfsemi sem skyldar félögin að geyma iðgjöldin í sjóðum til að mæta tjóni og banna eigendum félaganna að mergsjúga þau?“

Í tilkynningu Sjóvá segir að við uppgjör þriðja ársfjórðungs 2018 hafi Sjóvá kynnt horfur um samsett hlutfall eftir ársfjórðungum þar sem fram kom að á fjórða ársfjórðungi væri gert ráð fyrir 95% samsettu hlutfalli og 97% samsettu hlutfalli fyrir árið. Jafnframt kom fram að tilkynnt yrði um frávik frá horfum umfram 5 prósentustig í samsettu hlutfalli innan fjórðunga.

„Í kjölfar bruna hjá viðskiptavinum Sjóvár í atvinnuhúsnæði við Hvaleyrarbraut í Hafnarfirði föstudaginn 16. nóvember sl. má búast við að samsett hlutfall fjórða ársfjórðungs verði hærra en ráð var fyrir gert og eru horfur fjórðungsins því uppfærðar í 100%. Vegna endurtryggingasamninga takmarkast eigin áhætta Sjóvár í brunatjónum við 200 m.kr. Í ljósi ofangreinds eru horfur fyrir samsett hlutfall ársins 2018 nú um 98%.“