Rúnar Björn Þorkelsson, formaður málefnahóps Öryrkjabandalags Íslands um sjálfstætt líf, fordæmir harðlega þá meðferð sem Tryggvi Ingólfsson hefur fengið. Tryggva var vísað frá hjúkrunarheimilinu Kirkjuhvoli á Hvolsvelli þann 27 mars síðastliðinn og hefur þurft að vera í um átta mánuði á lungnadeild Landspítalans í Fossvogi vegna þeirrar einhliða ákvörðunar. Útskýringar frá hjúkrunarheimilinu og sveitarfélaginu hafa verið ýmsar, allt frá því að 12 starfsmenn heimilisins hafi skrifað undir lista um að hann ætti ekki að snúa aftur á Kirkjuhvol í að ekki væri hægt að tryggja öryggi hans.
Rúnar segir það ótrúlegt að sveitarfélög komist upp með það að brjóta lög.
„Það að sveitarfélög landsins geti komist upp með það að draga lappirnar við þá þjónustu sem þeim er skylt að veita samkvæmt lögum og mannréttindasamningum er alveg ótrúlegt. Hér eru klárlega mannréttindabrot í gangi og miklu meira að finna en bara þetta eina mál, þetta er bara toppurinn á ísjakanum.“
Hann einnig telur að það sé kominn tími til að nota dagsektir svo sveitarfélög fari að sinna sínu lögbundna starfi.
„Það er kominn tími á að ríkið fái heimildir til að beita sveitarfélög dagsektum sem bíta. Slíkt fyrirkomulag finnst á Norðurlöndunum og verður til þess að sveitarfélögin leysa úr málunum fljótt og örugglega.“