Alls námu tekjur af seldum ferðum í turn Hallgrímskirkju rúmum 279 milljónum króna árið 2017. Um 17 prósenta aukningu er að ræða frá 2016, en tekjur námu þá 238 milljónum króna. Árið 2010 voru tekjurnar 27 milljónir og því um mikla aukningu að ræða, sem rakin er til aukningar ferðamanna.
Tekjuafgangur Hallgrímssóknar nam 66 milljónum. Heildartekjur Hallgrímskirkju námu 377 milljónum. Sóknargjöld frá ríkinu voru rúmar 32 milljónir önnur framlög voru 28,8 milljónir. Tekjuafgangur var 66 milljónir. Fréttablaðið greinir frá.
Kirkjan hefði því skilað fimm milljóna króna hagnaði þó svo hún hefði ekki notið opinberra styrkja, sem námu alls 61 milljón.
„Það er mjög ánægjulegt að Hallgrímskirkja skuli hafa tekjur af turni og fleiru til að geta staðið undir rekstri kirkjunnar auk viðhalds sem hefur verið gríðarlega kostnaðarsamt á undanförnum árum. Að auki er unnið að því að greiða niður lán vegna viðgerðar sem lauk árið 2008.“
segir Sigrún Hjálmarsdóttir, framkvæmdastjóri Hallgrímskirkju. Hún segir við Fréttablaðið að hún sjái ekki enn fyrir endann á framkvæmdum þar sem fram undan sé enn frekara viðhald, viðgerðir og endurnýjun.