Reykjanesbrautin hefur lengi verið þrætuepli í pólitík og lengi hefur verið unnið að endurbótum á veginum, sem er einn sá fjölfarnasti á landinu. Mörg alvarleg slys og óhöpp hafa orðið á Reykjanesbrautinni og skoraði Hafnarfjarðarbær á Sigurð Inga Jóhannesson samgönguráðherra að hafa þetta í huga í nýrri samgönguáætlun. Sigurður Ingi sagði sjálfur að brýnt væri að huga að ákveðnum köflum Reykjanesbrautarinnar, einmitt þeim er liggi í gegnum Hafnarfjörð. Hefur verið kallað eftir tvöföldun á þeim kafla, sem myndi minnka líkur á slysum og greiða betur úr þeim umferðarhnút sem jafnan skapast, en um 20 þúsund bílar fara þessa leið á sólarhring.
Sigurður Ingi sagði við RÚV á dögunum að í forgangi samgönguáætlunar væri að aðskilja akstursstefnur á leiðinni í gegnum Hafnarfjörð og tvöfalda veginn, sem og á kaflanum sunnan við álverið í Straumsvík. Hann sagði að verið væri að bregðast við alvarlegum slysum, en það yrði ekki gert á einum degi og vonaði að menn færu eins varlega og hægt væri í umferðinni á meðan. Aðspurður hvort ekki væri hægt að flýta þessum framkvæmdum, sagði Sigurður að til greina kæmi að taka Reykjanesbraut út úr samgönguáætlun og fjármagna hana með öðrum hætti, með því augnamiði að flýta fyrir framkvæmdum.
Tryggvi Helgason, fyrrum flugstjóri og stofnandi flugfélagsins Norðurflugs á Akureyri, leggur til aðra hugmynd í grein í Morgunblaðinu í dag:
„Það er þá spurningin, hvort hugsanlegt sé að fara aðra leið, í staðinn fyrir veginn sem liggur í gegnum Hafnarfjörð. Vil ég því stinga upp á nýrri leið sem væri lögð frá gatnamótum núverandi Reykjanesbrautar við Vífilsstaðaveg í áttina suður yfir Elliðavatnsveg, þaðan áfram suður fyrir alla byggð í Hafnarfirði, og þaðan liggi vegurinn áfram, beint í vestur í átt að Hvassahrauni, þar sem hann tengist við núverandi Reykjanesbraut.“
Telur Tryggvi að með því að fara þessa leið, gæti umferðarþunginn í gegnum Hafnarfjörð dottið niður í 2-3 þúsund bíla á sólarhring og þannig minnkað líkur á slysum og umferðarteppu:
„Á þessari leið verði vegurinn tvískiptur með tveimur akreinum í hvora átt. Þá verði engin gatnamót, nema með vegbrúm á viðeigandi stöðum. Brýrnar þurfa ekki að vera nema af einföldustu gerð, ein akrein í hvora átt yfir Reykjanesbrautina. Sennilega þarf ekki nema tvær eða þrjár brýr á þessari leið, kannski fjórar eða fimm, eftir kringumstæðum. Þessi nýi vegur yrði um 18 til 20 kílómetrar, eftir því hvar komið væri inn á veginn við Hvassahraun. Þessi leið er sennilega ekki nema um hálfum til einum kílómetra lengri en núverandi leið gegnum Hafnarfjörðinn, en yrði mun greiðfærari og fljótfarnari en núverandi leið, og miðað við ákjósanlegar aðstæður, þá yrði umferðartíminn um 13 til 15 mínútur frá afleggjaranum við Hvassahraun að vegamótum við Vífilsstaðaveg.“
Tryggvi leggur til að nýja leiðin liggi utan við Hafnarfjörð, líkt og hvíta línan sýnir.
