Á fundi borgarráðs í gær lögðu fulltrúar Sjálfstæðisflokksins og Miðflokksins til að Reykjavíkurborg léti kanna hvort skaðabótaskylda hefði skapast þegar Jón Gnarr, fyrrum borgarstjóri, lét farga listaverki eftir Banksy, sem hékk á skrifstofu Jóns í Ráðhúsinu í borgarstjóratíð sinni. Morgunblaðið greinir frá.
Einnig var óskað eftir öllum tölvupóstssamskiptum Jóns Gnarr og annarra starfsmanna borgarinnar við fulltrúa Banksy vegna listaverksins, auk þess sem óskað var eftir áliti borgarlögmanns á því hvort Jóni hefði verið heimilt að taka verkið með sér heim eftir að borgarstjóratíð hans lauk.
Afgreiðslu málsins var frestað í borgarráði.
Samkvæmt siðareglum kjörinna fulltrúa Reykjavíkurborgar þarf að skrá gjafir sem þeir þiggja, ef verðmætið er metið yfir 50.000 krónur, en Jón þvertók fyrir það á dögunum að um verðmætt og ósvikið verk væri að ræða, heldur plakat.
Jón segir að samskiptin við Banksy hafi farið fram í gegnum þriðja aðila. Eftir langan tíma fékk hann síðan myndina senda í gegnum tölvupóst með þeim skilaboðum að hann mætti prenta hana út og hengja upp.
Sjá nánar: Jón Gnarr losar sig við umdeilda Banksy-verkið:„Ég var bara smá einfeldningur“
