Ríkisstjórnin samþykkti á fundi í dag skipun starfshóps um sérstakar aðgerðir sem miða að því að aðstoða fólk við að fjármagna húskaup. Ásmundur Einar segir tíma aðgerða runninn upp. Aðgerðirnar verða að norskri fyrirmynd, en þar bíður systurstofnun Íbúðalánasjóðs upp á svokölluð startlán.
Á vefi Stjórnarráðs Íslands kemur fram að ríkisstjórnin hafi í dag samþykkt tillögu Ásmundar Einars Daðasonar, félags- og jafnréttismálaráðherra, um skipun starfshóps til að útfæra sértækar aðgerðir til að gera ungu og tekjulágu fólki kleift að kaupa sér íbúðarhúsnæði.
Þessi ákvörðun er í samræmi við stjórnarsáttmála ríkisstjórnarinnar þar sem kveðið er á um aðgerðir til að lækka þröskuld ungs fólks og tekjulágra inn á húsnæðismarkaðinn og endurskoðun á stuðningskerfi hins opinbera til þess að stuðningurinn nýtist fyrst og fremst þessum hópum.
„Nú er mikil greiningarvinna að baki og komið að því að stíga fyrsti skref til aðgerða. Þess vegna tel ég nauðsynlegt að kalla fleiri að borðinu að útfæra þær nánar og hrinda þeim í framkvæmd“ er haft eftir Ásmundi Einari og sagði hann jafnframt að tími aðgerða væri runninn upp.
Á fundinum í dag var samþykkt að ráðast í aðgerðir áþekkar þeim sem Husbanken, systurstofnun Íbúðalánasjóðs í Noregi, býður upp á í formi svokallaðra startlána. Startlán eru íbúðalán með lægri vöxtum og lægri eiginfjárkröfu en þekkist á markaðinum og eru aðeins veitt til þeirra sem ekki geta aflað sér fjármögnunnar með hefðbundnum leiðum. Startlánum eru fyrst og fremst veitt til fjölskyldna sem búa við fátækt en einnig til fyrstu kaupenda, flóttafólks, fólk með fötlun og fólks sem býr við félagsleg vandamál.