Umhverfis- og auðlindaráðuneytið hefur óskað eftir umsögnum um frumvarp vegna breytinga á lögum um hollustuhætti og mengunarvarnir. Með frumvarpinu er innleidd Evróputilskipun er lýtur að því að draga úr notkun á þunnum burðarpokum úr plasti. Þetta kemur fram í tilkynningu frá ráðuneytinu.
Í frumvarpinu er sett fram tillaga að tölulegum markmiðum sem skuli náð varðandi árlega notkun burðarpoka úr plasti. Lagt er til að eigi síðar en 31. desember 2019 skuli árlegt notkunarmagn burðarpoka úr plasti vera 90 á hvern einstakling eða færri og eigi síðar en 31. desember 2025 skal árlegt notkunarmagn vera 40 burðarpokar eða færri.
Þá er lagt til í frumvarpinu að óheimilt verði að afhenda burðarpoka, þ.m.t. burðarpoka úr plasti, án endurgjalds á sölustöðum vara og að gjaldið verði sýnilegt á kassakvittun.
Að lokum er lagt til að óheimilt verði að afhenda burðarpoka úr plasti, hvort sem er með eða án endurgjalds, á sölustöðum vara frá og með 1. júlí 2021.
Ekki eru allir sammála skaðsemi plastpoka þegar kemur að mengun. Framkvæmdarstjóri Sorpu, Björn Halldórsson, sagði nýverið að plastpokar væru aðeins 0.6 prósent af því rusli sem urðað væri hér á landi.
Verslanir Bónus hættu nýverið notkun plastpoka í verslunum sínum. Björn segir slíkar aðgerðir byggjast að mörgu leyti á misskilningi og ef til vill ekki alltaf á staðreyndum. Hann segir að mengun vegna plastpoka verði að skoða í víðara samhengi, ekki aðeins útfrá útblæstri, heldur einnig áhrifa á ósonlagið, eiturefnaáhrifa á mannfólk, jónageislun, ryk í lofti, súrnun jarðvegs, efnamengun og fleira.